मुख्यमंत्री भजनलाल शर्मा कह्यो है के सरकार प्रदेश मांय पाणी पूगावणो तैय करण सारू सगळा जरूरी जतन कर रही है। वे बुधवार ने चित्तौड़गढ़ कने निम्बाहेड़ा मांय राख्यी ज्यी जनसभा मांय बोल रह्या हा। ईं मौके श्री शर्मा विकास रा करीब सात सौ करोड़ रुप्या रा खर्च वाळा काम जनता ने सूंप्या। मुख्यमंत्री कह्यो के सरकार पाणी सारू मध्यप्रदेश सरकार सागे मिल र रामजल सेतु परियोजना रो अर हरियाणा सागे यमुना जल समझौतो कीनो है। मुख्यमंत्री कह्यो के प्रदेश मांय कठे ई पाणी री कमी नी आवण दी जावेला। मुख्यमंत्री डोढ़ साल बनाम पांच साल रो जिक्र करता थकां कह्यो के राज्य री लारली सरकार जो काम पांच साल मांय नी कर सकी, वे वां रा राज मांय डोढ साल मांय ई कर दिया ज्या। वे निम्बाहेड़ा मांय अहिल्याबाई होल्कर री मूरत रो अनावरण कीनो अर स्मृति पार्क जनता ने सूंप्यो। श्री शर्मा बीस सरकारी महकमां री जनता रा भला री योजनावां रो दरसाव करण वाळी विकास प्रदर्शनी ई देख्यी।