मुख्यमंत्री भजनलाल शर्मा प्रदेश मांय चाल रह्या पंडित दीनदयाल उपाध्याय अंत्योदय संबल पखवाड़ा रा तैत चाल रह्या शिविरां रो लगातार दौरो कर र शिविरां मांय न्यारा-न्यारा महकमां कानी ऊं कर्या जा रह्या जनता रा भला रा कामां री जाणकारी ले रह्या है। वे मंगलवार चूरू की जोड़ी ग्राम पंचायत मांय लगायी ज्या अंत्योदय शिविर रो जायज़ो लीनो। ईं मौके जनता ने सम्बोधित करता थकां श्री शर्मा कह्यो के आखिरी पायदान रा लोगां री जिन्दगी ने बेहतर बणावणो ई सम्बल पखवाड़ा रो मकसद है। मुख्यमंत्री कह्यो के प्रदेश मांय नौजवानां, महिलावां, गरीबां अर किसानां रा विकास री यात्रा लगातार चालती रेहवेला। वे कह्यो के काश्तकारां री माली हालत ने मज़बूत बणावण सारू पशुपालन जरूरी है।
ईं पाछे मुख्यमंत्री बीकानेर ज़िला रा श्रीडूंगरगढ़ कने गुसाइसरबड़ा गांव मांय लगायी ज्या शिविर रो जायजो लीनो अर जनसभा ने संबोधित कीनी। श्री शर्मा पांच साल मांय चार लाख नौकरियां देवण रो सरकार रो संकल्प दोहरायो। वे कह्यो के साल 2027 तांई किसानां ने दिन मांय ई बिजली मुहैया करा दी जावेला। फिलहाल 22 ज़िलां मांय किसानां ने दिन मांय ई बिजली मुहैया करायी जा रही है। पंडित दीनदयाल उपाध्याय अंत्योदय संबल पखवाड़ा रा तहत प्रदेशभर री चुण्यी ज्यी ग्राम पंचायतां मांय लगाया जा रह्या शिविरां ऊं गांव वाळां ने फायदो मिल रह्यो है। कोटपूतली-
बहरोड़ ज़िला रा डुमरोली मांय लगायी ज्या शिविर मांय बंटवारा रा 50 साल जूना मामला रो राजीनामा ऊं निपटारो करी ज्यो। ईं मामला री एक पार्टी रा बाबूलाल यादव बतायो के एक ई दिन मांय करी ज्या ईं फैसला ऊं सगळा 15 सह-खातेदार राजी है।