मुख्यमंत्री भजनलाल शर्मा थावर ने बालोतरा अर जोधपुर रो दौरो कर ने पंडित दीनदयाल उपाध्याय अंत्योदय संबल पखवाड़ा रे तैत चाल रह्या शिविरां रो जायज़ो लियो। ई दौरान मुख्यमंत्री जनसभावां मांय भाषण ई कर्या। मुख्यमंत्री जोधपुर रा शेरगढ़ हलका रा सोईतरा गांव मांय संबल पखवाड़ा रो जायजो लियो। मुख्यमंत्री वृक्ष कुंज रो उद्घाटन कर्यो। मुख्यमंत्री वृक्षारोपण महाअभियान रे तैत ई कुंज मांय महिलावां सात हजार पौधा लगाया है। बालोतरा रा सिवाणा हलका रा पादरू मांय जनसभा मांय बोलता श्री शर्मा पैली री कांग्रेस सरकार माथे फगत घोषणावां करण रो आरोप माण्ड़्यो। श्री शर्मा कह्यो के वां री सरकार गरीब कल्याण री योजनावां रो ऐलाण ई नी कर री है बल्कि वां ने धरा माथे उतारण सारू वाजिब बजट ईं देय री है। मुख्यमंत्री कह्यो के राज्य मांय पांच हजार गांवां ने गरीबी मुक्त करण री प्रक्रिया चाल री है। आवण वाळा बगत मांय दस हजार गांवां ने बी.पी.एल. मुक्त कर्या जायेला।मुख्यमंत्री बालोतरा ज़िला शिक्षा सशक्तिकरण कार्यक्रम री सरूआत करी। ई दौरान सिक्किम रा राज्यपाल ओम माथुर ई मौजूद रिया। पशुपालन मंत्री जोराराम कुमावत अर उद्योग राज्य मंत्री के.के. विश्नोई ई कार्यक्रम मांय शिरकत करी।