मुख्यमंत्री भजनलाल शर्मा कह्यो है के प्रदेश मांय न्यारा-न्यारा दूध संघ विकास, जनता री भागीदारी अर खुद रे पाण ऊबा व्हेवण रा नुवा आयाम बणाया है। श्री शर्मा सोमवार ने अलवर मांय श्वेत क्रांति 2.0 अर अलवर दुग्ध संघ दिवस कार्यक्रम मांय बोल रह्या हा। ईं मौके वे सिलिसेढ़ हलका मांय ट्यूबवेल अर पाइपलेण रे मार्फत अलवर शहर री पीवण रा पाणी री योजना और बेहतर बणावण रा काम री नींव रखी। ई मौके मुख्यमंत्री कह्यो के डेयरी हलका मांय महिलावां री भागीदारी बधी है, जिण ऊं राज्य माली तौर ऊं मज़बूत बण रह्यो है। वे कह्यो के केंद्र अर राज्य सरकार किसानां अर पशुपालकां रा भला सारू लगातार निर्णायक कदम उठा रही है।
मुख्यमंत्री नौजवानां रा भला सारू करीजी कोशिशां रो ई जिकर कीनो। वे कह्यो के लारला 17 महीना मांय एक ई पेपर लीक नी व्ह्यो। श्री शर्मा कह्यो के लारली सरकार रा राज मांय व्ह्या पेपरलीक रा मामलां मांय 300 ऊं बत्ता आरोपितां ने गिरफ्तार कर्या जा चुक्या है। कार्यक्रम मांय केंद्रीय वन अर पर्यावरण मंत्री भूपेंद्र यादव कह्यो के श्वेत क्रांति रा दूजा दौर रा तैत अलवर मांय 700 नुवी डेयरियां खोली जावेला। वे कह्यो के प्रधानमंत्री डेयरी ने बधावो देवण सारू महिलावां ने मज़बूत बणावण, स्थानीय दूध उत्पादन ने बधावो देवण, डेयरी री बुनियादी ताकत ने मज़बूत बणावण अर डेयरी ऊं बणायी ज्या सामान री दिसावर मांय बिक्री ने बधावण माथे ज़ोर दीनो है। श्री शर्मा मोतीडूंगरी मांय महाराणा प्रताप री मूरत रो अनावरण ई कीनो। इण ऊं पैली श्री शर्मा जयपुर मांय वां रा रेहवास माथे जनसुणवाई कीनी। ईं मौके वे कह्यो के राज्य सरकार जबावदेही अर साफगोई सागे सुशासन सारू काम कर रही है।