मुख्यमंत्री भजनलाल शर्मा बुधवार ने श्रीगंगानगर री नुवी धान मंडी मांय किसानां ने बेचान पर्ची दे र राज्य मांय सरसों री सरकारी मोल माथे खरीदी रा काम री सरूआत कीनी। सरकार सरसों रो सरकारी मोल पांच हजार नौ सौ पचास रुप्या प्रति क्विंटल तैय कीनो है, जद के चणा री खरीदी पांच हजार छह सौ पचास रुप्या प्रति क्विंटल रा हिसाब ऊं करी जावेला। सरसों री खरीदी सारू 13 लाख 22 हजार मीट्रिक टन रो लक्ष्य राख्यी ज्यो है। ईं दौरान मुख्यमंत्री किसानां सागे बातचीत करता थकां कह्यो के सरकार काश्तकारां ने साखां रो उचित मोल दिरावणो तैय कीनो है। वे कह्यो के राज्य री मौजूदा सरकार प्रदेश री लारली सरकार रे मुकाबले सरसों रा सरकारी मोल मांय नौ सौ रुप्या री बधोतरी कीनी है। श्री शर्मा कह्यो के राज्य री मौजूदा भाजपा सरकार किसानां री बरकत सारू लगातार काम कर रही है। इंर् बीचे आज श्रीगंगानगर अर हनुमानगढ मांय खरीदी सरू व्ही। काल ऊं पूरा राज्य मांय खरीदी सरू व्हे जावेला। राजफेड रा वाणिज्य महाप्रबंध कार्तिकेय मिश्रा आकाशवाणी ने बतायो के खरीदी सारू किसानां रा नाम माण्डण रो काम एक अप्रैल ऊं सरू कर दियो ज्यो हो। वे बतायो के हाल तांई एक लाख 20 हजार ऊं बत्ता किसान नाम मंडा दीना है अर उपज बेचण सारू हाल ई नाम मण्डाया जा सके है। श्री मिश्रा बतायो के खरीद केंद्रां माथे छाया, पानी अर कानून व्यवस्था बणायी राखण सारू जरूरी प्रबंध करी ज्या है।