मुख्यमंत्री भजनलाल शर्मा कह्यो है के चिकित्सा सेवा रो हलको है अर सेवा मन ने शांति देवण रो काम है। वे सोमवार ने जयपुर रा एक गैर-सरकारी विश्वविद्यालय रा दीक्षांत समारोह मांय बोल रह्या हा। मुख्यमंत्री कह्यो के चिकित्सा अर स्वास्थ्य माथे सरकार रो खास ध्यान है अर बजट मांय 27 हजार 660 करोड़ रुप्या यानि बजट रो 8 दशमलव 26 फीसदी हिस्सो केवल चिकित्सा अर स्वास्थ्य सारू राख्यो है। वे कह्यो के राजस्थान डिजिटल हैल्थ मिशन रे मार्फत रहवासियां ने स्वास्थ्य रिकॉर्ड रो ऑनलाइन सुबीतो मुहैया करायो जा रह्यो है। श्री शर्मा कह्यो के राज्य सरकार मुख्यमंत्री आयुष्मान आरोग्य हेल्थ इन्फ्रास्ट्रक्चर मिशन रा तहत ईलाज ऊं जुड़्या बुनियादी ढ़ांचा ने बेहतर बणा रही है, जिण रा तैत स्वास्थ्य हलका मांय 3 सालमांय 15 हजार करोड़ रूप्या रा काम कराया जावेला। मुख्यमंत्री कह्यो के 9 ऊं 11 दिसम्बर बीचे व्हेवण वाळी राइजिंग राजस्थान ग्लोबल इन्वेस्टमेंट समिट रे ज़रिए चिकित्सा अर स्वास्थ्य समेत हर हलका मांय निवेश लायो जा रह्यो है अर हाल तांई 25 लाख करोड़ रुप्या रा करार कर्या जा चुक्या है। कार्यक्रम मांय मुख्यमंत्री मेडिकल री न्यारी-न्यारी डिग्रियां हासिल करण वाळां ने सोना रा तमगा अर डिग्रियां दे र नवाजी ज्या।