मुख्यमंत्री भजनलाल शर्मा कह्यो है के राज्य सरकार विकास रो फायदो समाज रा आखिरी छोर माथे ऊबा हर एक जणा तांई पूगावण माथे खास ध्यान दे रही है। वे गुरूवार ने सिरोही मांय रामलला प्राण प्रतिष्ठा री दूजी सालगिरह रे मौके राख्यी ज्या राज्य स्तर रा कार्यक्रम मांय बोल रह्या हा। वे ज़ोर दे र कह्यो के प्रदेश मांय कानून व्यवस्था ऊँ खिलवाड़ करण वाळां अर अशांति फैलावण वाळां रे खिलाफ करड़ी कार्रवाई करी जावेला। वे कह्यो के राज्य मांय कांग्रेस रा राज मांय व्ह्या घोटाळां री जांच चाल रही है अर दोषियां ने नी छोड़्या जावेला। ईं मौके वे रिमोट कंट्रोल रे जरिये किसान सम्मान निधि री पाँचवीं किश्त समेत न्यारी-न्यारी योजनावां रो फायदो लेवण वाळां रा खाता मांय 1,590 करोड़ रुप्या भेज्या अर ग्राम उत्थान शिविरां रो उद्घाटन कीनो। कार्यक्रम मांय राज्यसभा सदस्या अर भारतीय जनता पार्टी रा प्रदेश अध्यक्ष मदन राठौड़ कह्यो के प्रधानमंत्री नरेन्द्र मोदी री अगुवाई मांय देश खुद रे पाण ऊबो व्हे रह्यो है अर राजस्थान सरकार वां ई सोच सागे काम कर रही है। कार्यक्रम मांय राज्य मंत्री ओटाराम देवासी बतायो के सरकार री नीतियां ऊँ किसान अर गांवांई हलकां री जनता ने सीधो फायदो मिल रह्यो है।