मुख्यमंत्री भजनलाल शर्मा कह्यो है के विकसित भारत-रोजगार अर आजीविका मिशन गारंटी कानून-वीबी जी राम जी गांवाई हलकां मांय नौकरी-धंधा रा मौका तैय करण री दिशा मांय ऐतिहासिक कदम है। वे बुधवार सिंज्या ईं बारा मांय खबरनवीसां सागे बातचीत कर रह्या हा। श्री शर्मा कह्यो के मनरेगा मांय रही खामियां रे कारण जनता री रकम सही तरीका ऊं काम नहीं ली जा सक रही ही।
श्री शर्मा कह्यो के वीबी-जी राम जी कानून ऊं गांवाई हलकां मांय स्थायी अर गुणवत्तापूर्ण संपत्तियां बणायी जा सकेला। वे कह्यो के ओ कानून गांवाई हलकां मांय काम-धंधा ऊं जुड़ी नीति ने विकसित भारत रा रोडमैप ऊं जोड़ेला अर राज्य ने इण रो पूरो फायदो मिलेला। मुख्यमंत्री कह्यो के ईं रा तैत जल संसाधन, गांवाई हलकां मांय बुनियादी ढांचा, आजीविका अवसंरचना अर आपदा प्रबंधन ऊं जुड़्या ठोस अर टिकाऊ काम कराया जावेला।
मुख्यमंत्री कह्यो के जियो-टैगिंग, सैटेलाइट इमेजरी, मोबाइल ऐप अर ए.आई. सरीखी नुवी तकनीकां काम ले र साफगोई तैय करी जावेला। ईं सारू हर छह महीना मांय डिजिटल तथ्यां सागे सोशल ऑडिट ज़रूरी बणायी ज्यी है।
