महाराणा प्रताप स्पोर्ट्स यूनिवर्सिटी जयपुर बिल-2025 रा मजमून ने शुक्रवार ने राज्य मंत्रिमंडल री मीटिंग मांय मंजूरी दीरीजी। प्रदेश मांय विश्व स्तर री खेल प्रतिभावां तैयार करण रा मकसद ऊं ओ बिल विधानसभा रा आवता सत्र मांय पेश कर्यो जावेला। मुख्यमंत्री भजनलाल शर्मा री सदारत मांय व्ही मीटिंग मांय शुक्रवार ने केई खास फैसला करी ज्या। आं मांय राजमेस मेडिकल कॉलेजां मांय एनआरआई कोटा रा तैत दाखिला सारू फीस कम करण, गुजर चुक्या कर्मचारियां रा मायतां अर दिव्यांग संतान सारू पारिवारिक पेंशन रा प्रावधानां ने आसान बणावण अर न्यारा-न्यारा महकमा मांय काम कर रह्या कर्मचारियां ने पदोन्नति रो फायदो देवण सारू सेवा नियमां मांय बदलाव समेत केई फैसला शामिल है। मीटिंग पाछे खबरनवीसां ने आं फैसलां री जाणकारी देता थकां उपमुख्यमंत्री प्रेमचंद बैरवा बतायो के खेल विश्वविद्यालय, खेल विज्ञान, स्पोर्ट्स टेक्नोलॉजी अर परफॉर्मेन्स एनालिटिक्स माथे शोध ने बधावो देवेला, जिण ऊं खिलाड़ियां रा खेल मांय सुधार आवेला। उपमुख्यमंत्री बतायो के राजमेस कॉलेजां मांय एनआरआई सीटां माथे दाखिला सारू फीस ने मैनेजमेंट कोटा री फीस रो अढाई गुना करीजी है। इण ऊं साल 2025-26 रा प्रवेश सत्र मांय एनआरआई कोटा री सीटां री फीस कम व्हे र करीब 23 लाख 93 हजार रुप्या सालाना रह जावेला, जो गैर-सरकारी मेडिकल कॉलेजां री औसत फीसद रे करीब है। संसदीय कार्यमंत्री जोगाराम पटेल खबरनवीसां ने बतायो के मंत्रिमण्डल 5 हजार 200 मेगावॉट बूता री सूरज री रोशनी ऊं बिजली बणावण री परियोजनावां सारू कुछ शर्तां सागे जमीं आवंटित करण री मंजूरी ई दीरीजी है। वे बतायो के राजस्थान सिविल सेवा पेंशन नियम मांय ई बदलाव करी ज्या है। इण रे मुजब गुजर चुक्या कर्मचारियां रा मायतां ने अब 50 फीसदी तांई पारिवारिक पेंशन अर दिव्यांग संतान ने ब्याह पाछे ई पेंशन रो फायदो दियो जावेला।