मध्य प्रदेश के मुख्यमंत्री डॉ. मोहन यादव कह्यो है के एम.पी. अर राजस्थान बीचे पाणी ऊं जुड्यो कोई झगडो नी है। वे साफ कीनो के राजस्थान ने पाणी री जरूरत पड़बा री सूरत मांय मध्यप्रदेश पूरी मदद करेला। वे जयपुर मांय चाल रह्या राजस्थान डिजिफेस्ट-टाई ग्लोबल समिट-2026 मांय बोल रह्या हा। डॉ. यादव ’डेस्टिनेशन मध्य प्रदेश’ सत्र मांय राजस्थान री बरकत री सराहवणा कीनी। वे कह्यो के मध्यप्रदेश अर राजस्थान री भेळी विरासत सागे विकास ने तेज करण सारू दोन्यू राज्यां ने मिल र काम करणो व्हेला। मध्यप्रदेश रा मुख्यमंत्री कह्यो के राजस्थान मांय पाणी री कमी नी आवण दी जावेला अर आवता बगत मांय विकास री नई इबारत लिखी जावेला। सम्मेलन रा एक और खास सत्र ’लीडरशिप बियॉण्ड लेबल्स’ मांय पैली वाळी केंद्रीय मंत्री स्मृति ईरानी महिलावां री अगुवाई अर सामाजिक जिन्दगी मांय वां री भागीदारी रा बारा मांय चर्चा कीनी। वे नौ करोड़ स्वयं सहायता समूहां ऊं जुड़ी महिलावां ने नुवा भारत री ताकत बताता थकां कह्यो के महिलावां तकनीक, नीति अर स्टार्टअप सरीखा हर हलका मांय आगे बध रही है। एक और सत्र मांय दुबई इंटरनेट सिटी रा मैनेजिंग डायरेक्टर अम्मार अल मलिक आवता बगत मांय शहर बणावण अर वां रे वैश्विक हब बणबा री संभावनावां रा बारा मांय चर्चा कीनी। ईं सागे ई जाणकारी लोग न्हाना उद्योगां – एमएसएमई री तरक्की मांय राज्यां रा काम अर सहायक नीतियां रा महत्त्व रा बारा मांय ई बात कीनी।
