भारत रा सशस्त्र बल बीती रात ऑपरेशन सिंदूर चला र पाकिस्तान मांय अर पाकिस्तान रा कब्जा वाळा जम्मू-कश्मीर मांय नौ आतंकी ठिकाणा नेस्तनाबूद कर दीना। ओ ऑपरेशन करीब 25 मिनट तांई चाल्यो। रक्षा मंत्री राजनाथ सिंह फौज री सराहवणा करता थकां कह्यो के वे लक्ष्य माथे सटीक निशाणो लगायो अर पूरो ध्यान राख र कार्यवाही कीनी। राष्ट्रीय सुरक्षा सलाहकार-एनएसए अजीत डोभाल ई पाकिस्तान मांय अर वां रा कब्जा वाळा जम्मू-कश्मीर मांय आतंकी ढांचां माथे कार्यवाही रा तुरत पाछे केई देशां रा राष्ट्रीय सुरक्षा सलाहकारां सागे बात कर र कार्रवाई री जाणकारी दीनी। वे बतायो के भारत रो इरादो तणा-तणी बधावण रो नी है, पण पाकिस्तान री हर कार्रवाई रो भारत करड़ो जवाब देवण सारू पूरी तरह तैयार है। नई दिल्ली मांय फौज, वायु सेना अर विदेश मंत्रालय कानी ऊं राख्यी ज्यी प्रेस वार्ता मांय कर्नल सोफिया कुरैशी अर विंग कमांडर व्योमिका सिंह बतायो के पहलगाम आतंकी हमला री जवाबी कार्रवाई रा तौर ऊं आ कार्यवाही करीजी। विदेश सचिव विक्रम मिसरी कह्यो के पहलगाम आतंकी हमला री जांच मांय पाकिस्तान रा आतंकियां सागे रिश्तां री ठा पड़ी है। प्रधानमंत्री नरेंद्र मोदी राष्ट्रपति द्रौपदी मुर्मू सागे मुलाकात कीनी। राष्ट्रपति सोशल मीडिया पोस्ट रे जरिये कह्यो के मीटिंग रे दौरान प्रधानमंत्री वां ने ईं कार्यवाही रा बारा मांय जाणकारी दीनी। केंद्रीय गृह मंत्री अमित शाह ई बुधवार ने दोपहर राजस्थान समेत पाकिस्तान ऊं लागती सरहद रा 9 राज्यां रा मुख्यमंत्रियां, मुख्य सचिवां अर पुलिस महानिदेशकां सागे मीटिंग कर र ज़रूरी विचार कीनो। पाकिस्तान रा आतंकी ठिकाणां माथे कार्यवाही पाछे राज्यपाल हरिभाऊ बागडे फौज री वीरता ने नमन कीनो है। वे कह्यो के सेना सटीक, सतर्क अर संयमित कार्यवाही कीनी। पाकिस्तान मांय आतंकी ठिकाणा माथे एयर स्ट्राइक पाछे न्यारी-न्यारी सियासी पार्टियां रा नेता फौज री सराहवणा कीनी। प्रदेश कांग्रेस अध्यक्ष गोविंद सिंह डोटासरा ईं कार्रवाई ने “आतंक रा खिलाफ़ निर्णायक कदम“ अर देश रा एका री मिसाल बतायी। रक्षा विशेषज्ञ कर्नल राजेश भूकर बतायो के ईं ऑपरेशन ऊं पाकिस्तान ने भारत मांय आतंकवादी वारदातां बंद करण रो संदेश दियो ज्यो है। फौज रा ऑपरेशन सिंदूर ने ध्यान राखता थकां प्रदेश मांय ई सावचेती राखण री राय दीरीजी है। बीकानेर, जोधपुर अर किशनगढ़ हवाई अड्डां ऊं उड़ानां फिलहाल टाळ दीरीजी है। जयपुर हवाई अड्डा ऊं ई बुधवार ने संवारे कुछ उड़ानां रद्द कर दीरीजी। राज्य रा चार सरहदी जिलां श्रीगंगानगर, बाड़मेर, जैसलमेर अर बीकानेर मांय सरकारी अर गैर-सरकारी स्कूलां सारू छुट्टी रो ऐलाण कर दियो ज्यो। आं जिलां मांय तय इम्तिहान ई टाळ दिया ज्या। ईं बीचे सरकारी कर्मचारियां री छुट्टियां रद्द कर दीरीजी है अर वां ने मुख्यालय नी छोड़बा री हिदायत दीरीजी है। ऑपरेशन सिंदूर ने ध्यान राखता थकां केई देशी उड़ानां रद्द कर दीरीजी है। एयर इंडिया रे मुजब जम्मू, श्रीनगर, लेह, जोधपुर, अमृतसर, भुज, जामनगर, चंडीगढ़ अर राजकोट आवण-जावण वाळी उड़ानां 10 मई तांई रद्द कर दीरीजी है। देश रा हिफ़ाजती इन्तज़ामात मज़बूत करण री निजर ऊं बुधवार ने पूरा देश रा 244 नागरिक सुरक्षा जिलां मांय मॉकड्रिल करी ज्यी। पहलगाम आतंकी हमला पाछे गृह मंत्रालय मोटा पैमाना माथे रेहवासियां री हिफाजत ऊं जुड़ी मॉकड्रिल करण रो फैसलो कीनो हो। इण रो मकसद किण ई आतंकी हमला रा हालात रो सामो करण जनता ने तैयार करणो है। प्रदेश मांय ई राजधानी जयपुर समेत 28 शहरां मांय ओ अभ्यास कर्यो जा रह्यो है। ईं रा तैत सायरन बजा र लोगां ने चेतायी ज्या। बुधवार रात ने ब्लैक आउट ई कर्यो जावेला। ईं दौरान लाइटां अर बिजली ऊं चालण वाळा साज-ओ-सामान बंद राखण री राय दीरीजी है। ईं सागे खिड़कियां अर दरवाजा ई बंद राखण री सलाह दीरीजी है। रेडियो, मोबाइल फोन अर दूजा ज़रियां ऊं प्रसारित कर्या जावण वाळा सरकारी निर्देश सुण अर वां री पालना करण बाबत् ई कही ज्यो है। प्रदेश रा न्यारा-न्यारा जिलां मांय व्हे रह्या ईं अभ्यास मांय पुलिस, चिकित्सा अर स्वास्थ्य विभाग, स्काउट गाइड अर दूजा खुद सेवक संगठनां रा सदस्य शिरकत कर रह्या है। जयपुर रा जिला कलेक्टर डॉ. जितेन्द्र कुमार सोनी सगळां ऊं देश सारू एकजुट व्हे र कर्तव्य निभावण री अपील कीनी। ईं बीचे मुख्यमंत्री भजनलाल शर्मा बुधवार ने जयपुर मांय आला दर्जा री मीटिंग लीनी। वे सरहदी हलकां मांय खास निगराणी राखण रा हुकम दीना। श्री शर्मा पाकिस्तान मांय आंतकी ठिकाणां माथे करीजी कार्यवाही ने ध्यान राखता थकां प्रदेश मांय ई हिफाजती इन्तज़ामात चाक चौबंद राखण बाबत् कह्यो। मुख्यमंत्री अहलकारां ऊं केन्द्रीय एजेंसियां सागे तालमेल कर र आपदा प्रबंधन अर नागरिक सुरक्षा सारू सगळा ज़रूरी जतन करण सारू ई कह्यो। मुख्य सचिव सुधांश पंत जनता ऊं सावचेत रेहवण अर अफवाहां माथे ध्यान नी देवण री अपील कीनी है।