भाई-बहन रा असीम दुलार अर सामाजिक समरसता रो तिवांर राखी बंधन दीतवार ने रित मुजब उमाव रे साथै मनायी ज्यो । संवारां ऊं ई घरां मांय उमाव रो माहौल बण्यो है। बहनां भाईयां री कलाई राखियां ऊं सजायी अर वां री लंबी उम्र री कामना करी। भाईयां ईं आप री बहनां ने हिफ़ाजत रो वचन अर निजराना दिया। टाबरां ने ले र बड़ा तांई ई भावना ऊं जुड़़्या पावन पर्व रो आनंद लेवे। भारतीय संस्कृति रा ई तिवांर माथे राज्यपाल हरिभाऊ बागड़े ने रक्षा सूत्र बांधण सारू केई बालिकावां अर ब्रह्माकुमारी ई राजभवन पूगी। वठे ई मुख्यमंत्री भजनलाल शर्मा दीतवार ने आप रा रहवास माथे वीरांगनावां, सामाजिक कार्यकर्तावां, वकीलां अर न्यारा-न्यारा हलकां ऊं जुड़ी महिलावां अर पढेसरां ऊं रक्षा सूत्र बंधवाया। उपमुख्यमंत्री दिया कुमारी दक्षिण-पश्चिम कमान मुख्यालय मांय सैनिकां रे साथै रक्षाबंधन मनायो। लोकसभा अध्यक्ष ओम बिरला कोटा मांय आप रा रहवास माथे रक्षा बंधन मनायो। वणा आदिवासी महिलावां ऊं रक्षा सूत्र बंधवाया। वठे ई ऊर्जा मंत्री हीरालाल नागर रे वीरांगना राखी बांधी। रक्षा बंधन रे मौके घणी तादाद मांय महिलावां अर बालिकावां रोडवेज री बसां मांय मुफ़्त जातरा रो फायदो लियो। हनुमानगढ़ रा टिब्बी रा सरकारी कॉलेज री छात्रा दो दिन री ई सौगात सारू मुख्यमंत्री रो आभार जतायो। पाली रा बाली मांय कैदियां रे ब्रह्मकुमारी बहनां राखी बांधी। इण रे साथे ई कैदियां अपराध छोड़ण अर जीवन मांय बदलाव लावण रो संकल्प लियो। चूरू, झुंझुनूं, सीकर समेत केई ठौड़ां बहनां अर वीरांगनावां शहीदा री मूरत रे राखी बांध ने वां री याद ने जीवत कर्या। कोटपूतली-बहरोड़ मांय रक्षाबंधन रा तिवारं माथे पुलिस अधीक्षक देवेन्द्र कुमार विश्नोई सड़क सुरक्षा रा संकल्प रो संदेश दियो। रक्षाबंधन रा तिवांर माथे कई ठौड़ां कौमी एकता री मिसाल ई देखण ने मिली। बाड़मेर ऊं म्हाणा खबरनवीस बतायो के शिव हलकां मांय खेजड़ी रा पेड़ां रे राखी बांध ने पर्यावरण संरक्षण रो संदेश दीरीज्यो। अंतर्राष्ट्रीय भारत-पाक सरहद माथे बहनां बी.एस.एफ. रे राखी बांध ने सन्मान प्रकट कर्यो। अलवर मांय ईं मौके पतंग उड़ावण री रीत निभाई जावे। फैरू ईं बिरखा रे करण पतंगबाज़ी नी करी ज्यी।