भरतपुर समेत प्रदेश रा केई हिस्सां मांय लोग आग री परकम्मा कर उण मांय तिल, गुड़ अर अनाज डाल्या। इण मौके सामूहिक भोज अर लोहड़ी रा पारंपरिक गीतां रे सागे खुशियां बाटी जा री हैं। मकर संक्रांति री पैली री सिंज्यां माथे मंगलवार ने प्रदेश भर रा बाजारां मांय  भारी रौनक छाई व्ही है। मारवाड सूं ले र वागड़ तांई उत्सव अर परंपरा रो अणूठो संगम देखबा ने मिल रह्यो है। डूंगरपुर रा सागवाड़ा मांय 50 बरसा सूं चली आ री अणूठी परंपरां रे तैत न्यारा-न्यारा समाज मिल र गौ-माता खातर खास ’गौ-ग्रास’ तैयार कर्यो। इण खातर शुद्ध घी, गुड़ अर आटा सूं रोटियां बणाई गईं, ज्याने काल संक्रांति रे मौके सिरधा भाव सूं गाया ने खिलायो जावेला। पाली रा बाजारां मांय तिल-गुड़ रा लड्डू अर गजक री दुकानां माथे खरीदारा री भारी भीड़ है। वठिने कोटपूतली-बहरोड़ मांय मोटयार पर्यावरण ने बचावा खातर मुश्तैद दीख रिया है। अठे लोग प्लास्टिक री ठौड़ कागद री पतंगां ने बत्तो खरीद रह्या है।