भगवान बिरसा मुंडा री जयंती काल जनजातीय गौरव दिवस रा तौर ऊं मणायी जावेला। ईं मौके राज्य मांय न्यारा-न्यारा कार्यक्रम राख्या जावेला। राज्य स्तर रो जळसो डूंगरपुर मांय राख्यो जावेला, जिण मांय मुख्यमंत्री भजनलाल शर्मा ई भाग लेवेला। ईं मौके वे जनजाति संस्कृति अर विकास ऊं जुड़ी प्रदर्शनी ने निरखण सागे जनता ने केई सौगातां देवेला। कार्यक्रम के दौरान मुख्यमंत्री समाज कल्याण विभाग री ओर ऊं 40 स्कूटी अर बैटरी ऊं चालण वाळी 23 व्हील चेयर बांटेला। मुख्यमंत्री सुखद दाम्पत्य योजना रो फायदो लेवण वाळा दो जणा ने 5-5 लाख रूप्या अर अंतर्जातीय विवाह योजना रा एक लाभार्थी ने 10 लाख रूप्या री पहली किश्त रा तौर ऊं अढ़ाई लाख रुप्या रो चैक सूंपेला। श्री शर्मा महिला स्वयं सहायता समूहां ने ई 31 करोड़ रूप्या रा कर्ज मुहैया करावेला। वां रो न्यारी-न्यारी सरकारी योजनावां रो फायदो लेवण वाळां सागे बातचीत रो ई कार्यक्रम है। जिला कलेक्टर अंकित कुमार सिंह कार्यक्रम री तैयारियां रो जायज़ो लीनो। वे कह्यो के प्रशासन कार्यक्रम सारू सगळी जरूरी तैयारियां कर रह्यो है। भगवान बिरसा मुंडा री जयंती रे मौके प्रदेश रा न्यारा-न्यारा ज़िलां मांय ई कार्यक्रम व्हेला, जिण मांय मंत्री, जनता रा नुमाइंदा अर अहलकार भाग लेवेला। जनजाति गौरव वर्ष रा सिलसिला मांय प्रदेश मांय न्यारी-न्यारी ठोड़ां कार्यक्रम राख्या जा रह्या है। शुक्रवार ने पाली ज़िला परिषद् मांय दो दिन री प्रर्दशनी सरू व्ही। काल शहर रा खास गेलां ऊं व्हेती थकी शोभा यात्रा निकाळी जावेला। सलूंबर मांय जिला स्तर री पंच गौरव कबड्डी होड़ राख्यी ज्यी। इण मांय पुरुष अर महिला वर्ग री 24 टीमां रा कोई 400 खिलाड़ी भाग लीनो। सवाईमाधोपुर मांय शुक्रवार ने ज़िला प्रशासन री ओर ऊं सिनेमा घरां मांय जनजातीय तबका ऊं जुड़्या महापुरुषां, स्वतंत्रता सेनानियां अर संतां ऊं जुड़ी फिल्म बतायी ज्यी। झुंझुनूं रा गांधी पार्क मांय सांस्कृतिक कार्यक्रम राख्यी ज्या।