बुधवार ने संविधान दिवस हरक उमाव सागे मणायी ज्यो। ईं मौके राष्ट्रपति द्रौपदी मुर्मू नई दिल्ली रा संविधान सदन रा केंद्रीय कक्ष मांय संविधान री प्रस्तावना बांची। ईं मौके वे कह्यो के संविधान देश री ओळखाण री नींव है अर देश ने आगे बधावण अर गुलामी री सोच हटा र राष्ट्रवादी नज़रियो स्थापित करण रो गेलो बतावण वाळो ढाँचो है। कार्यक्रम मांय लोकसभा अध्यक्ष ओम बिरला कह्यो के संविधान रा बताया गेला ऊँ देश सुशासन, सामाजिक अर माली विकास री लगातार बदल रही यात्रा माथे चाल रह्यो है। लोकसभा अध्यक्ष संविधान सभा रा सगळा सदस्यां सागे सभा रा अध्यक्ष डॉ. राजेंद्र प्रसाद अर संविधान बणावण वाळा रा तौर ऊँ डॉ. भीमराव अंबेडकर ने ई सिरधाभाव सागे याद कीना। प्रधानमंत्री नरेन्द्र मोदी संविधान बणावण वाळां ने सिरधाभाव सागे याद करता थकां कह्यो के वां री आगे री सोच देश रा हर रहवासी ने विकसित भारत बणावण री सीख देती रेहवेला। राज्य मांय ईं मौके भांत-भांत रा कार्यक्रम राख्यी ज्या। पुलिस मुख्यालय मांय पुलिस महानिदेशक राजीव कुमार शर्मा अहलकारां अर कर्मचारियों ने संविधान री शपथ दिरायी अर सगळा मिल र संविधान री प्रस्तावना बांची। झुंझुनूं मांय ई पुलिस रा अहलकार अर कर्मचारी संविधान रा मान अर कर्तव्यां री पालना करण री शपथ लीनी। बालोतरा ज़िला री स्कूलां मांय मतदाता साक्षरता क्लब रा तैत विद्यार्थियां ने संवैधानिक अधिकार, कर्तव्य अर वोट देवण रा महत्त्व रा बारा मांय जाणकारी दीरीजी। सवाईमाधोपुर अर सिरोही ज़िलां मांय ई “हमारा संविधान-हमारा स्वाभिमान“ मुद्दा माथे संगोष्ठी, निबंध अर वाद-विवाद री होड़ां समेत न्यारा-न्यारा कार्यक्रम राख्यी ज्या।