बीकानेर, जयपुर अर भरतपुर संभाग रा कुछ हलकां मांय मंगलवार ने ई लू रो असर रह्यो। पाली, हनुमानगढ़, श्रीगंगानगर, चूरू, जैसलमेर अर बारां समेत न्यारी-न्यारी ठौड़ां पड़ रही ज़ोरदार गर्मी ऊं हाल बेहाल रह्या। सवाईमाधोपुर मांय ई ज़ोरदार तावड़ो पड़ रह्यो है। दिन ऊग्यां ई पड़ रह्या ज़ोरदार तावड़ा ऊं घणी परेशानी व्हे रही है। प्रशासन री ओर ऊं लू अर तावड़ा रा असर ऊं बचाव सारु एडवाइजरी जारी करी ज्यी है। पाली रा सीएमएचओ विकास मारवाल दिन री बगत ज़रूरी व्हेवण परां ही बाहर जावण अर पीवण री चीजां काम लेता रेहवण री अपील कीनी है। मौसम विभाग रे मुजब काल ऊं 23 मई तांई बीकानेर, जोधपुर, जयपुर अर भरतपुर संभाग मांय कठे-कठे पारो 45 ऊं 47 डिग्री सेल्सियस बीचे रेहवण री संभावना है। ईं सागे ई रात री बगत ई तापमान ऊं रेहवण रा आसार है। ईं दौरान सरहदी हलकां मांय धूळो उड़बा सागे ज़ोरदार बायरो बाजण री संभावना है। मौसम केन्द्र जयपुर रा निदेशक राधेश्याम शर्मा बतायो के आवता दो दिन मांय केई ठौड़ां पारो 1 ऊं 2 डिग्री सेल्सियस तांई चढ़बा रा आसार है।