बाल विवाह मुक्त भारत बणावण सारू गुरूवार ने एक सौ दिन रो गहन जागरूकता अभियान सरू करी ज्यो। केंद्रीय महिला अर बाल विकास मंत्री अन्नपूर्णा देवी नई दिल्ली मांय इण री सरूआत कीनी। ओ अभियान बाल विवाह मुक्त भारत अभियान री पहली वर्षगांठ रा सिलसिला मांय चलायी ज्यो है। ईं मौके अन्नपूर्णा देवी अर महिला अर बाल विकास राज्य मंत्री सावित्री ठाकुर मौजूद लोगां ने टाबर-टाबरियां रा बाळपणा मांय ब्याह नी करण री सौगंध दिरायी। ईं अभियान रा तैत स्कूलां, कॉलेजां, विश्वविद्यालयां अर पंचायतां मांय भांत-भांत रा कार्यक्रम राख्या जावेला। ईं मौके महिला अर बाल विकास मंत्री अन्नपूर्णा देवी कह्यो के सरकार साल 2030 तांई देश मांय बाळपणा मांय ब्याह री रीत जड़ ऊं खत्म करणो तय कीनो है। वे कह्यो के समाज, समुदायां अर जनता री भागीदारी ऊं देश बाल विवाह मुक्त भारत बणबा ओड़ी लगातार आगे चाल रह्यो है। ओ अभियान आवता साल 8 मार्च ने अंतर्राष्ट्रीय महिला दिवस रे मौके पूरो व्हेला। बाल विवाह मुक्त भारत अभियान रो एक साल पूरो व्हेवण रे मौके राज्य मांय भांत-भांत रा कार्यक्रम राख्यी ज्या। पाली मांय 100 दिन रा खास अभियान री सरूआत रे मौके कार्यक्रम राख्यी ज्यो। ईं दौरान टाबरियां ने बाळपणा मांय ब्याह री रोकथाम रा बारा मांय जाणकारी दीरीजी अर वां ने बाल विवाह नी करण री सौगंध दिरायी ज्यी। वठे नई दिल्ली मांय व्ह्या राष्ट्रीय कार्यक्रम रो सीधो प्रसारण ई बतायी ज्यो। कोटपूतली-बहरोड़ ज़िला मांय बाल विवाह रे खिलाफ “हर घर दस्तक“ अभियान सरू करी ज्यो। कार्यक्रम रा तैत ईं बारा मांय ज़रूरी जाणकारी दी जा रही है। टाबर-टाबरियां रा ब्याह रा आयोजन री जाणकारी चाइल्ड हेल्पलाइन नम्बर 1098 माथे दी जा सके है।