बारां ज़िला री अंता विधानसभा सीट माथे उपचुनाव सारू मंगलवार ने शांति सागे वोट पड़्या। सिंज्यां साढे पांच बज्यां तांई ईं विधानसभा हलका मांय 78 फीसदी ऊँ बत्ता वोट पड़बा रा समाचार है। बारां रा अतिरिक्त ज़िला निर्वाचन अधिकारी भंवर लाल आकाशवाणी ने बतायो के वोट शांति सागे पड़्या। अंता मांय वोट देवण सारू मतदान केंद्रां माथे लम्बी लेणा निजर आयी। दूजी कानी साकली गांव रा मतदान केंद्र संख्या-219 माथे लोग वोट देवण ऊँ नट ग्या। वां री हिमायत मांय निर्दलीय उम्मीदवार नरेश मीणा धरनो दीनो हालांकि 15 मिनट पाछे ई वे धरनो खत्म कर दीनो। अंता उपचुणाव सारू भारतीय जनता पार्टी रा मोरपाल सुमन, कांग्रेस रा प्रमोद जैन अर निर्दलीय नरेश मीणा समेत 15 उम्मीदवार चुणाव लड़ रह्या है। वोटां री गिणती 14 नवम्बर ने करी जावेला। भाजपा रा विधायक कंवर लाल मीणा ने एक जूना मामला मांय अदालत कानी ऊँ दोषी करार दिया जावण रे कारण इंर् साल मई महीना ऊं वां री विधानसभा सदस्यता खत्म कर दीरीजी ही। ईं कारण ईं सीट माथे उपचुनाव करायो जा रह्यो है। दूजी कानी बिहार मांय मंगलवार ने 20 ज़िलां री 122 विधानसभा सीटां माथे चुनाव सारू वोट पड़्या। वठे दोपहरां पाछे 3 बजां तांई 60 दशमलव चार-शून्य फीसदी वोट पड़बा रा समाचार है। किशनगंज मांय 66 फीसदी ऊँ बत्ता वोट पड़बा रा समाचार मिल्या है जो ईं विधानसभा चुनाव रा दूजा दौर मांय शामिल 20 ज़िलां रा विधानसभा हलकां मांय सब ऊँ बत्तो है।