बारां ज़िला री अंता विधानसभा सीट माथे उपचुनाव सारु भारतीय जनता पार्टी रा उम्मीदवार मोरपाल सुमन थावर ने पर्चा दाखिल कीनो। ईं दौरान वां सागे सांसद दुष्यंत सिंह, विधायक राधेश्याम बैरवा, ललित मीणा, पैली वाळा विधायक नरेंद्र नागर अर भाजपा रा केई ओहदादार मौजूद रह्या। रिटर्निंग अधिकारी रे मुजब उप चुनाव सारू हाल तांई 12 जणा 17 पर्चा दाखिल कीना है। नामपाना 21 अक्टूबर तांई दाखिल कर्या जा सकेला। 23 अक्टूबर ने पर्चां री जांच करी जावेला, अर 27 अक्टूबर तांई नाम पाछा लिया जा सकेला। 11 नवम्बर ने वोट पडे़ला जद के 14 नवम्बर ने वोटा री गिणती करी जावेला। ईं बीचे निर्वाचन आयोग उपचुनाव रे दिन सगळा कर्मचारियां सारू तनख्वाह सहित छुट्टी रो ऐलाण कीनो है। आयोग रे मुजब वोट देवण वाळा जो लोग दूजी ठौड़ा ऊँ वोट देवण सारू आवेला वां ने ई ओ सुबीतो मिलेला।