बारां जिला री अंता विधानसभा सीट माथे होबा वाळा उपचुनाव खातर प्रचार दीतवार ने सिंज्या पूरो व्हीयो। प्रचार रा आखिरी दिन दीतवार ने भाजपा प्रत्याशी मोरपाल सुमन रा समर्थन मांय मुख्यमंत्री भजनलाल शर्मा रोड़ शो कर्यो। पैली री मुख्यमंत्री वसुंधरा राजे, सांसद दुष्यंत सिंह अर प्रदेश पार्टी अध्यक्ष मदन राठौड़ भी इण मांय भेळा व्हीया। वठीने कांग्रेस पार्टी रा उम्मीदवार प्रमोद जैन भाया रा प्रचार री कमान प्रदेश अध्यक्ष गोविन्द सिंह डोटासरा संभाळी। पैली रा मंत्री अशोक चांदना भी प्रमोद भाया ने जिताबा खातर लोगां सूं समर्थन मांग्यो। निर्दलीय उम्मीदवार नरेश मीणा भी चुनावी रण माथे पूरो दमखम लगाता व्हीया मुकाबला ने रोचक बणा रह्या है। आरएलपी प्रमुख हनुमान बेनीवाल वां रा जनसम्पर्क मांय लाग रह्या है। अंता सीट माथे उपचुनाव खातर 11 नवम्बर ने मतदान व्हेला। वठीने 14 नवम्बर ने वोटां री गिनती रे पाछे नतीजां रो ऐलाण कर्यो जावेला।