बारां जिला री अंता विधानसभा सीट सारू 11 नवम्बर ने होवण वाळा उपचुनाव रो दिन नजदीक आवण रे साथे ही प्रचार जोर पकड़ण लाग्यो है। ई सीट माथे रीत मुजब खास मुकाबलो भाजपा अर कांग्रेस रे बीचे है, जिण ने निर्दलीय उम्मीदवार नरेश मीणा त्रिकोणीय बणा रिया है। भाजपा ई सीट माथे मोरपाल सुमन ने मैदान मांय उतार्यो है। वठे ई कांग्रेस पैली रा मंत्री प्रमोद जैन भाया माथे फेरू भरोसो जतायो है। म्हारा खबरनवीस बतायो के दोन्यू दलां रा केई ठावा नेता चुणाव मैदान मांय उम्मीदवारां सारू प्रचार मांय उतर चुक्या है।