प्रसार भारती रा चैयरमेन नवनीत कुमार सहगल कह्यो है के रेडियो सूचनावां रो मज़बूत अर आसान ज़रियो है। वे थावर ने आकाशवाणी रा जयपुर केन्द्र मांय अहलकारां सागे समीक्षा बैठक मांय बोल रह्या हा। श्री सहगल कह्यो के रेडियो समाज रा न्यारा-न्यारा वर्गां ऊं जुड़ी प्रामाणिक जाणकारियां जनता तांई आसानी ऊं पूगा रह्यो है। वे कह्यो के आकाशवाणी ऊं प्रसारित कर्या जावण वाळा कार्यक्रम अब ओटीटी प्लेटफाॅर्म वेव्स माथे ई सुण्या जा सके है। मीटिंग रे दौरान श्री सहगल अहलकारां ऊं आकाशवाणी जयपुर ऊं प्रसारित कर्या जा रह्या कार्यक्रमां अर राज्य मांय एफ.एम. ट्रांसमीटरां रा बारा मांय जाणकारी लीनी। वे समसामयिक अर जनता रा भला ऊं जुड़्या कार्यक्रमां रो प्रसारण बधावण रा हुकम दीना। प्रसार भारती रा चैयरमेन कार्यक्रमां री गुणवत्ता ने बेहतर बणावण अर आमदनी मांय बधोतरी माथे ज़ोर दीनो। ईं मौके श्री सहगल आकाशवाणी परिसर मांय पौधो ई रोप्यो।