जयपुर मांय बुधवार ने ‘प्रवासी राजस्थानी दिवस 2025’ मनायो जावेला। इण समारोह मांय भाग लेबा खातर देश-विदेश रा सैंकडू प्रवासी राजस्थानी जयपुर पूग रिया है। ओ कार्यक्रम सुंवारे 10 बज्यां सूं जेईसीसी सभागार मांय सरू व्हेला अर खास जळसो दोपहर मांय व्हेला। समारोह रा उद्घाटन सत्र मांय मुख्यमंत्री भजनलाल शर्मा रो खास उद्बोधन व्हेला। मुख्यमंत्री रे अलावा उदघाटन जळसा मांय राज्यपाल हरिभाऊ बागड़े, पंजाब रा राज्यपाल गुलाब चंद कटारिया, केंद्रीय वाणिज्य अर उद्योग मंत्री पीयूष गोयल भी शामिल व्हेला। समारोह रा आठ सेक्टर मांय सेक्टर-स्पेसिफिक कल्चरल सेशन व्हेला, इण मांय रिन्यूएबल एनर्जी, पर्यटन, शिक्षा, उद्योग, स्वास्थ्य, जल संसाधन अर माइनिंग भेळा है। इण कार्यक्रम मांय भाग लेबा खातर 2 हजार 700 सूं बत्ता प्रवासी आपरां पंजीकरण करवाया है। इण बाबत जयपुर मांय गाढी तैयारियां करी गई है, शहर ने खास तौर ऊं सजायो गयो है। उद्योग आयुक्त सुरेश ओला बताया के प्रवासियां री यात्रा रा अनुभव ने यादगार बणाबा खातर खास तैयारियां करी गई हैं।
इण आयोजन री सरूआत राजस्थान री विकास यात्रा अर वर्तमान सरकार रा कार्यकाल मांय व्हीया विकास कामां री झलक दिखाबा वाळी प्रदर्शनी ‘प्रगति पथ’ रा उद्घाटन रे सागे व्हेला। इण रे पाछे उद्योग अर वाणिज्य मंत्री कर्नल राज्यवर्धन राठौड़ रो स्वागत उद्बोधन व्हेला। म्हाका खबरनवीस रे मुजब इण कार्यक्रम मांय देश-विदेश रा केई जान्या-मान्या लोग भेळा व्हेला।