प्रधानमंत्री नरेन्द्र मोदी बुधवार ने तमिलनाडु रा कोयम्बटूर ऊँ पीएम किसान सम्मान निधि री 21वीं किस्त रा तौर ऊँ देशभर मांय 9 करोड़ किसानां री मदद सारू 18 हजार करोड़ रुप्या ऊँ बत्ती रकम जारी कीनी। वे कोयम्बटूर मांय दक्षिण भारतीय प्राकृतिक खेती सम्मेलन मांय ई शामिल व्ह्या। श्री मोदी किसानां ऊँ एक रूत मांय एक एकड़ ज़मीं माथे प्राकृतिक खेती करण री अपील कीनी। ईं मौके श्री मोदी कह्यो के लारला 11 साल मांय खेती हलका री काया पलट व्हे ग्यी। वे कह्यो के भारत प्राकृतिक खेती रा मामला मांय वैश्विक केंद्र बण ग्यो है अर इण री जैव विविधता नुवो आकार ले रही है। श्री मोदी कह्यो के देश मांय खेती री उपज री दिसावर मांय बिक्री दूणी व्हे ग्यी है अर सरकार खेती रा तरीकां ने नुवी बणावण री दिशा मांय जतन कीना है। वे कह्यो के किसान क्रेडिट कार्ड रे जरिये किसानां ने दस लाख करोड़ रुप्या ऊँ बत्तो फायदो मिल्यो है। पीएम किसान सम्मान निधि रो राज्य स्तर रो कार्यक्रम जयपुर रा कृषि अनुसंधान केन्द्र मांय राख्यी ज्यो। ईं दौरान प्रदेश रा 66 लाख 62 हजार किसानां रा खातां मांय 1 हजार 332 करोड़ रुप्या री रकम भेजी ज्यी। कार्यक्रम मांय मुख्यमंत्री भजनलाल शर्मा कह्यो के किसानां रा भला ऊँ ही देश रो विकास संभव है। श्री शर्मा कह्यो के हर मौसम अर हर हाल मांय किसान हमेशा काम करतो निज़र आवे है। मुख्यमंत्री कह्यो के किसानां, मजूरां, नौजवानां अर महिलावां रे आगे बधवा ऊँ देश आगे बधेला। वे कह्यो के किसानां ने ईं योजना रो फायदो पूगावण रा मामला मांय राजस्थान देश मांय पांचवीं ठौड़ माथे है।