प्रधानमंत्री नरेन्द्र मोदी थावर ने खेती-बाड़ी अर इण ऊं जुड़्या हलकां सारु 42 हज़ार करोड़ रुप्या ऊं बत्ता खर्च वाळी केई परियोजनावां री सरूआत कीनी अर पूरा व्ह्या काम जनता ने सूंप्या। श्री मोदी नई दिल्ली रा भारतीय कृषि अनुसंधान संस्थान मांय राख्यी ज्या कार्यक्रम मांय 35 हज़ार करोड़ रुप्या ऊं बत्ता खर्च वाळी खेती-बाड़ी ऊं जुड़ी दो खास पहलां, पीएम धन-धान्य कृषि योजना अर दलहन में आत्मनिर्भरता मिशन री सरूआत कीनी। कार्यक्रम रे दौरान, प्रधानमंत्री खेती-बाड़ी, पशुपालन, मछली पालन अर खाद्य प्रसंस्करण हलकां ऊं जुड़ी 5 हजार 450 करोड़ रुप्या ऊं बत्ता खर्च वाळी परियोजनावां रो उद्घाटन कीनो अर 815 करोड़ रुप्या रा खर्च वाळी परियोजनावां रा काम री नींव रखी। ईं मौके श्री मोदी कह्यो के पीएम धन धान्य कृषि योजना अर दलहन में आत्मनिर्भरता मिशन देश रा लाखां किसानां री किस्मत बदल देवेला। प्रधानमंत्री कह्यो के 21वीं सदी रा भारत रा विकास सारू देश री खेती-बाड़ी मांय सुधार ज़रूरी हा, जो साल 2014 मांय सरू करी ज्या। प्रधानमंत्री कह्यो के देश मांय खाद बणावण री छह नुवी कम्पनी ई खुली है अर लारला 11 साल मांय किसानां ने 25 करोड़ मृदा स्वास्थ्य कार्ड बांटी ज्या। श्री मोदी कह्यो के एनडीए रा राज मांय खेती-बाड़ी रा बजट मांय छह फीसदी री बधोतरी व्ही है अर जीएसटी री रेट मांय कमी ऊं देश रा गांवाई हलकां अर किसानां ने फायदो व्ह्यो है। श्री मोदी भारत ने विकसित देश बणावण मांय काश्तकारां रा खास काम रो जिकर कीनो। कार्यक्रम मांय केन्द्रीय कृषि मंत्री शिवराज सिंह चौहान कह्यो के आवता जीएसटी सुधारां रे जरिये खेती-बाड़ी ऊं जुड़्या सामान माथे जीएसटी री रेट कम कर र किसानां ने साता दीरीजी है। मुख्यमंत्री भजनलाल शर्मा ई वीडियो कॉन्फ्रेंसिंग रे जरिये ईं कार्यक्रम ऊं जुड़्या। इण ऊं पैली वे जयपुर रा राज्य कृषि प्रबंधन संस्थान मांय राख्यी ज्या राज्य स्तर रा कार्यक्रम मांय कह्यो के प्रधानमंत्री नरेंद्र मोदी धन-धान्य कृषि योजना, दलहन मिशन अर दूजी खास योजनावां चला र देश रा खेती-बाड़ी हलकां मांय नुवा ज़माना री सरूआत कीनी है। राज्य मांय जी.एस.टी. बचत उत्सव री जाणकारी देवण सारु न्यारी-न्यारी ठौड़ां कार्यक्रम राख्या जा रह्या है। सवाईमाधोपुर ज़िला रा करेल गांव मांय केंद्रीय संचार ब्यूरो री ओर ऊं जी एस टी बचत उत्सव अर पोषण माह रा बारा मांय जाणकारी देवण सारु जागरुकता रैली, संगोष्ठी, प्रदर्शनी चित्रकला, पोस्टर होड़ अर सवाल-जवाब री होड़ां राख्यी ज्यी। ईं दौरान आंगनबाड़ी कार्यकर्तावां री ओर ऊं पौष्टिक आहार री प्रदर्शनी अर होड़ राख्यी ज्यी। कार्यक्रम मांय शामिल स्कूली विद्यार्थियां, आंगनबाड़ी कार्यकर्तावां, महिलावां अर जनता ने साफ़-सफ़ाई राखण री शपथ दिरायी ज्यी।