प्रधानमंत्री नरेन्द्र मोदी लोगां सूं आवण वाळे त्यौहारां रे मौसम मांय वोकल फॉर लोकल रे मंत्र ने याद राखता थकां वांणे स्वदेशी उत्पादां रे साथे मणाणे री अरज करी है। आकाशवाणी सूं मन की बात कार्यक्रम री 126वीं कड़ी मांय थावर ने श्रोतावां रे साथे आपरा विचार साझा करता थकां वणा कयो कि आवण वाळा दिनां मांय केई त्यौहार है अर भारतीय उत्पादां ने खरीदणे सूं पिरवार मांय खुशियां बढ़ जावेली। श्री मोदी कयो के देश मांय तैयार उत्पादां ने खरीदणे सूं कारीगरां री मेहनत रो सम्मान व्हे अरयुवा उद्यमियां रे सपना ने उड़ान भी मिले। श्री मोदी कयो के त्यौहार रे मौसम रे चालता केवल घर ही नहीं, बल्कि सड़कां, पड़ोस, बाजार अर गांव री भी साफ-सफाई माथे ध्यान दियो जावणो चाहिजे। आवता दो अक्तूबर ने गांधी जयंती रे बारा मांय श्री मोदी कयो के महात्मा गांधी हमेशा स्वदेशी ने अपणाणे माथे जोर दियो, जिण मांय खादी सब सूं खास ही। प्रधानमंत्री कयो के थावर ने स्वतंत्रता सेनानी भगत सिंह अर गायिका लता मंगेशकर री जयंती होणे रे कारण मन की बात री आ कड़ी घणी खास हो ग्यी है। श्री मोदी कयो के अबे छठ पूजा एक वैश्विक उत्सव मांय बदल री है। वणा कयो के सरकार इण महापर्व ने यूनेस्को री सांस्कृतिक धरोहर सूची मांय भेळो करणे रो जतन कर री है। इण सूची मांय भेळो होणे सूं दुनियाभर रा लोग छठ पूजा री भव्यता अर दिव्यता रो अनुभव कर सकेला।
श्री मोदी कयो के अबे कारोबार सूं ले र खेल जगत तक अर शिक्षा सूं लेर विज्ञान तांई – हर खेतर मांय बेटियां आपरी पिछाण बणा री है। वणा नौसेना री दो बहादुर अधिकारी लेफ्टीनेंट कमांडर दिलना अर रूपा री कामयाबी रो जिकर कर्यो जिको नाविक सागर परिक्रमा रे चालता आठ महीना तांई समुद्र मांय जातरा करती रही। प्रधानमंत्री पूरे देश मांय आपरी पिछाण बणावण वाळा असम रा लोकप्रिय गायक ज़ुबिन गर्ग रे अचानक निधन माथे भी शोक जतायो।
वणा कयो कि ज़ुबिन रो असम री संस्कृति सूं गहरो लगाव हो अर वां रो संगीत आवण वाळी पीढ़ियां ने मंत्रमुग्ध करतो रेवेला। श्री मोदी देशवासियां ने दशहरा अर दीपावली री शुभकामनावां दी।
प्रदेश मांय भी प्रधानमंत्री रे मन की बात कार्यक्रम ने लेर खासो उच्छास निजर आयो। मुख्यमंत्री भजन लाल शर्मा आज जयपुर थापित आपरे रेवास माथे आमजन रे साथे मन की बात कार्यक्रम मांय प्रधानमंत्री रे संबोधन ने सुण्यो। वठी ने प्रदेश भाजपा मुख्यालय मांय भाजपा प्रदेशाध्यक्ष मदन राठौड़ पदाधिकारियां रे साथे प्रधानमंत्री रे मन की बात कार्यक्रम ने सुण्यो। वणा कयो के थावर ने मन की बात कार्यक्रम मांय प्रधानमंत्री नरेन्द्र मोदी देशवासियां ने प्रेरणा सूं भर दियो। सवाईमाधोपुर जिला रा शहरी अर ग्रामीण खेतर मांय मन की बात कार्यक्रम ने घणी तादाद मांय लोगां सुण्यो। वठी ने पाली मांय मन की बात रे 126वें एपिसोड ने सुण र लोगां स्वदेशी उत्पादां ने अपणाणे रो संकल्प लियो। सिरोही जिला मांय भी न्यारा न्यारा बूथां माथे मन की बात कार्यक्रम ने आमलोगां अर भाजपा कार्यकर्ताओं ने सुना। जिला थापित प्रदेश रा सब सूं ऊंचा पोलिंग बूथ शेर गांव मांय भी ग्रामीण मन की बात कार्यक्रम ने सुण्या।