प्रधानमंत्री नरेन्द्र मोदी अबै ऊँ थोड़ी देर पैला देश ने सम्बोधि करता कह्यो के आगली पीढ़ी रा जीएसटी सुधार नवरात्रां रे पैले दिन काले ऊँ लागू व्हेला। श्री मोदी कह्यो के जीएसटी बचत उत्सव काले ऊँ सरू व्हेला। लोग कम कीमत माथे आप री पसंद रो सामान खरीद सकेला। वणा कह्यो के देश री विकास गाथा आं सुधारां से साथै बदल जायेला। नौजवान, नुवां मझला तबका, काश्तकारां, महिलावां अर कारोबारियां ने ई बचत उत्सव ऊँ घणो फायदो व्हेला। वणा कह्यो के हर राज्य देश रा विकास री जात्रा मांय बरोबर रो साझेदार व्हेला। प्रधानमंत्री कह्यो के वां री सरकार टैक्स प्रणाली ने सरल बणाया है। वणा बतायो के साल 2014 मांय सत्ता मांय आवण रे पछे राज्यां अर हितधारकां ऊँ राय रे पछे वां री सरकार वस्तु अर सेवाकर ने वरीयता दी है। वणां कह्यो के जरूरी चीजां, दवाइयां अर स्वास्थ्य बीमा पांच फीसदी टैक्स रा दायरा मांय व्हेला। प्रधानमंत्री खुशी जतावता कह्यो के लारला 12 सालां मांय 25 करोड़ लोग गरीबी ऊँ उबर्या है। वणा कह्यो के जीएसटी कम होवण ऊँ मझला तबकां रा सपना पूरा करणा और सरल व्हेला। अठिने प्रदेश मांय 22 ऊँ 29 सितम्बर तांई जीएसटी बचत उत्सव मनायो जायेला। ई अभियान रो मकसद जीएसटी दरां मांय कटौती रो फायदो लोगां तांई पूगावण रे साथै ई करोबारी तबका ने प्रेरित करणो है। मुख्यमंत्री भजनलाल शर्मा दीतवार ने जयपुर मांय जीएसटी दरां रा बारा मांय मंत्रियां अर विधायकां री वीडियों कॉनफेंस रे मार्फत मीटिंग लेवण पछे आ जाणकारी दी। वणा कह्यो के केन्द्र सरकार कानी ऊँ देशवासियां ने तिवारां रे शुभ मौके जीएसटी दरां मांय कमी री अनूठी सौगात दीरीजी है। इण रो पूरो फायदों तैय करण सारू जनजागरूकता जरूरी है। श्री शर्मा मंत्रियां अर विधायकां ने निर्देश दिया के अभियान रा बगत वे आप-आप रा हलकां मांय जीएसटी बचत उत्सव रो घणो प्रचार-प्रसार करे अर लोगां मांय जाग जगावे।