प्रधानमंत्री नरेन्द्र मोदी रा जन्मदिन रे मौके बुधवार ऊँ सेवा पर्व री सरूआत व्ही।ईं रा तैत पूरा राज्य मांय केई कार्यक्रम राख्या जा रह्या है। मुख्यमंत्री भजन लाल शर्मा जयपुर रा मालवीय नगर ऊँ शहरी सेवा शिविर री सरूआत कीनी। ई मौके वे कह्यो के प्रधानमंत्री मोदी री दूरदर्शी सोच देश रा करोड़ां लोगां री जिन्दगी मांय खुशहाली लायी है। वे कह्यो के प्रधानमंत्री नरेन्द्र मोदी री अगुवाई मांय लारला 11 साल मांय देश रा भला रा ऐतिहासिक काम व्ह्या है अर भारत दुनिया री चौथी मोटी माली व्यवस्था बण ग्यो है। मुख्यमंत्री कह्यो के श्री मोदी री जन सेवा री भावना ऊँ सीख ले र राज्य सरकार शहरी सेवा शिविर लगा रही है। श्री शर्मा कह्यो के आं शिविरां रे मार्फत आखिरी छोर रा मिनखा तांई आराम पूगायो जावेला। मुख्यमंत्री शहरी सेवा शिविर 2025 री मार्गदर्शिका रो विमोचन कीनो अर प्रधानमंत्री आवास योजना रो फायदो लेवण वाळां ने चैक अर दूजी योजनावां रो फायदो लेवण वाळां ने पट्टा दीना। श्री शर्मा बुधवार ऊँ जयपुर कने बस्सी ऊँ ग्रामीण सेवा शिविरां री सरूआत ई कीनी। आं रे जरिये जनता न्यारी-न्यारी सरकारी योजनावां रो फायदो लेवण सारू अर्जियां पेश कर सकेला अर वां अर्जियां ने मंजूरी देवण रा काम कर्या जावेला। ई दौरान भांत-भांत री सेवावां अर सुबीता एक ही ठौड़ मुहैया करया जावेला। प्रधानमंत्री मोदी रा जन्मदिन रे मौके बुधवार ऊँ मुख्यमंत्री भजनलाल शर्मा जयपुर रा जवाहर कला केन्द्र मांय ‘नमो प्रदर्शनी’ रो उद्घाटन कीनो। ईं प्रदर्शनी मांय प्रधानमंत्री मोदी रा मेक इन इंडिया, डिजिटल इंडिया, वोकल फॉर लोकल अर आत्मनिर्भर भारत सरीखा नवाचारां अर योजनावां माथे आधारित स्टॉल्स लगायी ज्यी है। इंर् सागे ई ऑपरेशन सिंदूर अर अयोध्या मांय बणायी ज्या राम मंदिर सरीखा ऐतिहासिक फैसलां रा बारा मांय ई प्रदर्शनी लगायी ज्यी है। मुख्यमंत्री प्रदर्शनी ने निरख्यां पाछे पैली वाळा फौजियां, नौजवान कारोबारियां अर कार्यकर्तावां सागे बातचीत कीनी। कार्यक्रम मांय मोदी स्टोरी श्रृंखला रा तहत जनता रा नुमाइन्दां रा प्रधानमंत्री मोदी सागे सीख देवण वाळा अनुभवां माथे आधारित नान्ही फिल्म ई बतायी ज्यी।
बुधवार ऊँ सेवा पखवाड़ो ई सरू व्ह्यो। ईं मौके जयपुर रा विद्याधर नगर मांय खूनदान अर ईलाज रा शिविर लगायी ज्या। इण मांय उपमुख्यमंत्री दिया कुमारी ई खूनदान कीनो। इंर् मौके दिया कुमारी कह्यो के सेवा भाव ऊँ ई समाज मांय सकारात्मक बदलाव आ सके है। वे जनता ऊँ मेडिकल कैम्प, सफाई अभियान अर जागरूकता ऊँ जुड़्या कार्यक्रमां मांय भागीदारी करण री अपील कीनी। उपमुख्यमंत्री सगळा ऊँ खूनदान करण अर जरूरतमंद लोगां री मदद सारू आगे आवण बाबत् ई कह्यो। जयपुर रा सीतापुरा मांय अखिल भारतीय तेरापंथ युवक परिषद् री ओर ऊँ मेगा ब्लड डोनेशन ड्राइव राख्यी ज्यो। मुख्यमंत्री भजन लाल शर्मा शिविर रो दौरा कर र खूनदान करण वाळां सागे मुलाकात कीनी। वे रक्तदान महादान रो संदेश ई दीनो। केंद्रीय कानून मंत्री अर्जुनराम मेघवाल बीकानेर मांय सेवा पखवाड़ा कार्यक्रमां रा तैत साइकिल रैली अर ट््यूर डे थार री सरूआत कीनी। इण मांय मोटी तादाद मांय साइकिल चलावण वाळा उमाव सागे सिरकत कीनी।
लोकसभा अध्यक्ष ओम बिरला बुधवार ऊँ प्रधानमंत्री नरेन्द्र मोदी रा जन्मदिन रे मौके सरू करी ज्या सेवा पखवाड़ा रा तैत कोटा मांय राख्यी ज्या स्वच्छता अभियान मांय शामिल व्ह्या। ईं मौके वे कह्यो के ईं पखवाड़ा मांय देशभर रा करोड़ां लोग सेवाभाव ऊँ जुड़ रह्या है, जो प्रधानमंत्री री जिन्दगी ऊँ मिली प्रेरणा रो प्रतीक है। लोकसभा अध्यक्ष शक्तिनगर मांय सफाई कर कर र साफ-सफाई राखण रो संदेश दीनो। ईं सागे ई वे कोटा नगर निगम रा सगळा वार्डां मांय स्वच्छता अभियान री सरुआत कीनी। श्री बिरला थेकड़ा मांय राख्यी ज्या नमो स्वास्थ्य जांच अर सुपोषण शिविर मांय ई शामिल व्ह्या। लोकसभा अध्यक्ष रामगंजमण्डी मांय सुपोषित माँ अभियान रा तीजा दौरा री सरूआत ई कीनी। ईं मौके आस वाळी लुगाइयां ने पोषण किट दिया ज्या। ईं पाछे खबरनवीसां सागे बातचीत करता थकां श्री बिरला प्रधानमंत्री मोदी री ज़िन्दगी ने समर्पण रो जीवन बतायो अर कह्यो के श्री मोदी वां री ज़िन्दगी जनता री सेवा मांय लगा दीनी। प्रधानमंत्री नरेन्द्र मोदी रा जन्मदिन रे मौके बुधवार ऊँ राष्ट्रीय पुरस्कार ऊँ नवाजी ज्यी फिल्म “चलो जीते हैं लगभग 500 सिनेमाघरां मांय अर स्कूलां मांय बतायी जा रही है। आ फिल्म 2 अक्टूबर तांई बतायी जावेला। इंर् मौके ’चलो जीते हैंः सेवा का सम्मान’ पहल रा तैत फिल्म रा दरसाव पाछे स्कूलां अर समाज रा ’अणबोल्या नायकां चौकीदार, सफाई कर्मचारी, ड्राइवर अर चतुर्थ श्रेणी कर्मचारियां रो मान कर्यो जावेला।