प्रधानमंत्री नरेन्द्र मोदी कह्या के देश ने थानीय उत्पादन ने बढ़ावो देबा खातर वोकल फॉर लोकल, आत्मनिर्भर भारत अर विकसित भारत रा मंत्र रे सागे आगे बढ़नो चाहिजे। दीतवार ने आकाशवाणी सूं मन की बात कार्यक्रम मांय वे कह्या के देशवासियां ने स्वदेशी ने ध्यान मांय राखाणो चाहिजे।प्रधानमंत्री कह्या के त्यौहारां री खुशियां रे बीच साफ-सफाई ने ध्यान मांय राखणो चाहिजे क्योंकि इण सूं त्यौहारां रो आनन्द और भी बढ़ जावे है। वे कह्या के एक भारत-श्रेष्ठ भारत री भावना देश रा विकास खातर ज़रूरी है इण मांय खेलां री बड़ी भूमिका है। प्रधानमंत्री कह्या के मॉनसून रे दौरान प्राकृतिक आपदावां देश ने कसौटी माथे कस री है। लारला कुछ एक हफ़्तां मांय देश बाढ़ अर भूकंप रो बड़ो कहर देख्यो है। श्री मोदी कह्या के संकट री इण घड़ी मांय थानीय लोग, सामाजिक कार्यकर्ता, डॉक्टर अर प्रशासन हर भांत री कोशिश करी है। प्रधानमंत्री डिजिटल ऐप प्रतिभा सेतु री भी चर्चा करी।
श्री मोदी कहा के सौर ऊर्जा काश्तकारां रा जीवन मांय बड़ो बदळाव ला री है। प्रधानमंत्री उण काश्तकारां रो जिक्र कर्या जो सौर ऊर्जा सूं खुद रे सागे आरे-सारे भी घणो बदळाव लाया है। प्रधानमंत्री कह्या के रामायण अर भारतीय संस्कृति री कानी प्रेम अबै दुनिया रा हर एक कोना मांय बढ़ रह्यो है। वणा इटली मांय महर्षि वाल्मीकि अर कनाडा मांय भगवान श्रीराम री प्रतिमावां रा अनावरण रो भी जिक्र कर्या। प्रधानमंत्री आवता म्हीना मनाई जाबा वाळी महान विभूतियां री जयंती रा बारा मांय कह्या के 15 सितम्बर ने भारत रा महान इंजीनियर एम. विश्वेश्वरैय्या रो जन्मदिन है जिण ने इंजीनियर दिवस रा रूप मांय मनायो जावे है। वठे ही 17 सितंबर ने विश्वकर्मा जयंती है। श्री मोदी बताया के ओ दिन विश्वकर्मा बंधुआं ने समर्पित है जो परंपरागत शिल्प, कौशल अर ज्ञान-विज्ञान ने लगातार एक पीढ़ी सूं दूजी पीढी तांई पूगा रह्या है। प्रदेश मांय भी प्रधानमंत्री नरेन्द्र मोदी रा ‘मन की बात‘ कार्यक्रम ने लेर खासो उछाव निजर आयो। मुख्यमंत्री भजनलाल शर्मा जयपुर मांय आप रा रहवास माथे मन की बात कार्यक्रम सुण्या। वठिने जैसळमेर जिला रा सीमा डेरा हलका तनोट मांय उपमुख्यमंत्री दिया कुमारी बीएसएफ रा जवानां रे सागे मन की बात कार्यक्रम ने सुण्या। पाली अर सवाईमाधोपुर समेत न्यारा-न्यारा जिलां मांय भी भाजपा कार्यकर्ता अर और आमजन मन की बात कार्यक्रम ने सुण्यो।