प्रधानमंत्री नरेन्द्र मोदी थावर ने पीएम किसान सम्मान निधि री 20वीं किस्त जारी कीनी। श्री मोदी उत्तर प्रदेश मांय वाराणसी ऊं आखा देश रा 9 करोड 70 लाख ऊं बत्ता किसानां रा खातां मांय 20 हजार 500 करोड़ रूप्या री रकम भेजी। प्रधानमंत्री करीब 22 सौ करोड़ रुप्या रा खर्च वाळी 52 विकास परियोजनावां रा काम री नींव रखी। ईं मौके प्रधानमंत्री कह्यो के लारला दस साल मांय सरकार किसानां री हर परेशानी दूर करण सारु पूरी कोशिश कीनी। श्री मोदी बतायो के किसानां सारु पीएम धन धान्य योजना ई चलायी जावेला, जिण रा तैत 24 हजार करोड़ रूप्या खर्च कर्या जावेला। श्री मोदी ईं मौके सगळां ऊं वोकल फॉर लोकल ने बधावो देवण री अरज कीनी। वे त्यौहारां रा दिनां मांय देशी सामान री खरीदी करण बाबत् ई कह्यो। प्रदेश रा 75 लाख किसानां रा खातां मांय ई पीएम किसान सम्मान निधि र तैत करीब 1 हज़ार 600 करोड़ रूप्या भेजी ज्या। मुख्यमंत्री भजन लाल शर्मा बांसवाड़ा मांय राख्यी ज्या राज्य स्तर रा जळसा मांय कह्यो के सरकार किसानां सागे है अर वां री बेहतरी सारु काम कर रही है। श्री शर्मा कह्यो के किसान अन्नदाता है जो आवता बगत मांय ऊर्जादाता ई बणेला। वे कह्यो के राज्य रा 22 जिलां मांय किसानां ने दिन मांय ई बिजली मिल रही है। मुख्यमंत्री ईं मौके पीएम आवास योजना रो फ़ायदो लेवण वाळां ने मकानां री चाबियां ई सूंपी। श्री शर्मा बांसवाड़ा मांय बांशिया भील स्मारक बणावण, मक्का प्रोसेसिंग यूनिट अर कालीबाई संग्रहालय बणावण रो ई ऐलाण कीनो। पीएम किसान सम्मान निधि री रकम किसानां रा खातां मांय भेजण रा कार्यक्रम ने प्रदेश रा सगळा ज़िलां मांय पीएम-किसान उत्सव दिवस रा तौर ऊं मणायी ज्यो। ईं कार्यक्रम रा राष्ट्रीय अर राज्य स्तर रा जळसा रो सीधो प्रसारण करी ज्यो। किसान सम्मान निधि री रकम मिल्यां पाछे किसानां मांय उमाव निजर आयो। अजमेर अर सवाईमाधोपुर ज़िला रा काश्तकार ईं सारू सरकार रो आभार जतायो।