प्रधानमंत्री नरेन्द्र मोदी कह्यो के 21वीं सदी रा भारत मांय विज्ञान नुवी उर्जा रे साथे आगे बध रह्यो है। दीतवार ने आकाशवाणी ऊं मन की बात कार्यक्रम मांय, वणा कह्यो के अंतरिक्ष ऊं शुभांशु शुक्ला री सुरक्षित वापसी ऊं देश मान ऊं भरीज ग्यो है। प्रधानमंत्री कह्यो के टाबरा मांय नवाचार ने बधावो देवण सारू सरू करी ज्या इन्सपायर-मानक अभियान रे तैत हर स्कूल ऊं पांच टाबर चुण्या जावे है अर हर बाळक एक नुवो आईडियो ले र आवे है। श्री मोदी खुशी जतायी के अजै तांई लाखो बाळक ई अभियान ऊं जुड़ चुक्या है। प्रधानमंत्री खुशी जतावता कह्यो के यूनेस्को भारत रा 12 किलां ने विश्व धरोहर ठौड़ ऐलाण कर्या है। आ मांय 11 किला महाराष्ट्र मांय है अर एक 1 तमिलनाडु मांय है। वणा राजस्थान मांय किलां रो ई जिक्रो कर्यो। श्री मोदी वोकल फॉर लोकल री बात करता कह्यो के साल 2047 रा विकसित भारत रो रस्तो आत्म-निर्भरता ऊं व्हे र निकळे है अर आत्मनिर्भर भारत री नींव जदे मज़बूत व्हेला जदे आपा वे ही खरीदा अर बेचा जिण ने आपा खुद बणा रिया हा। वणा कह्यो के प्राचीन पांडुलिपियां मांय विज्ञान, चिकित्सा-पद्धति, संगीत अर दर्शन रा बारा मांय जाणकारियां है। इण अनूठा ज्ञान अर विरासत ने सहेजणो हर रहवासी री जिम्मेदरी है। प्रधानमंत्री कह्यो के इण ऊं प्रेरणा ले र इण साल बजट मांय ज्ञान भारतम् मिशन रो ऐलाण करी ज्यो है। प्रधानमंत्री खुशी जतावता कह्यो के भारत अमरीका मांय व्ह्या विश्व पुलिस अर फायर गैम्स मांय कोई छह सौ तमगा जीत ने इतिहास रच्यो है। श्री मोदी कह्यो के लारला दिनां केई नौजवान एथलीटां अर वां रा मात-पिता ऊं मिल्या संदेशां मांय खेलो भारत नीति री घणी सराहवणा करी ज्यी है। प्रधानमंत्री कह्यो के स्वच्छ भारत मिशन अबै एक जन आंदोलन बण ग्यो है। ई साल स्वच्छ सर्वेक्षण मांय साढ़े चार हजार ऊं बत्ती शहर अर कस्बां जुड़्यां है। श्री मोदी हरियाळी तीज रे साथै ई आवण वाळा पिरवारां री देशवासियां ने शुभकामनावां दी है। प्रदेश मांय ईं मन की बात कार्यक्रम ने ले र लोगां मांय घणो उमाव निजर आयो। मुख्यमंत्री भजन लाल शर्मा आप रा रहवास माथे मन की बात कार्यक्रम ने सुण्या। भाजपा प्रदेश अध्यक्ष मदन राठौड़ घुमन्तू जाति समूह रे साथै प्रधानमंत्री रा कार्यक्रम ने सुण्या।