प्रधानमंत्री नरेंद्र मोदी कया के युवावां री क्षमता भारत रा भविष्य री सब ऊं बड़ी पूंजी है। रोजगार मेला युवावां ने मजबूत बणावण अर विकसित भारत रा निर्माण मांय वां री भागीदारी खातर सरकार री प्रतिबद्धता ने दर्शावे है। प्रधानमंत्री थावर ने वीडियो कॉन्फ्रेंसिंग रे जरिये न्यारा-न्यारा सरकारी महकमा मांय 51 हज़ार सूं बत्ता नौजवानां ने नियुक्ति पत्र देबा रे पछे रोज़गार मेळा मांय बोल रिया हा। वे कया के सरकार एक लाख करोड़ रूप्या आवंटित कर निजी हलका मांय रूजगार प्रोत्साहन योजना ने मंजूरी दी है। प्रधानमंत्री कया के लोकतंत्र अर मानवीय संसाधन देश री मजबूत ताकत है। 16वां रोज़गार मेळो देशभर री 47 ठोडां माथे राख्यो गयो। प्रदेश मांय जयपुर, अजमेर, बीकानेर अर जोधपुर मांय ये मेळा व्हीया। जयपुर मांय केन्द्रीय मंत्री भूपेन्द्र यादव, बीकानेर मांय अर्जुनराम मेघवाल, अजमेर मांय केन्द्रीय कृषि राज्यमंत्री भागीरथ चौधरी नियुक्ति पत्र दीना। वठी ने जोधपुर मांय केन्द्रीय मंत्री गजेन्द्र सिंह शेखावत नियुक्ति पत्र दे र मोट्यारा ने बधाई दी। खबरनवीस सूं बातचीत मांय श्री शेखावत कया के रोजगार मेळा रे जरिए लाखों री तादाद मांय नौजवानां ने नौकरियां मिली है। रोजगार मेळा रे दौरान नियुक्ति पत्र मिलबा वाळा मोट्यारा मांय घणो उच्छाव निजर आयो। वणा इण पहल खातर सरकार रो आभार जतायो। इण रे सागे ही वणा राष्ट्र निर्माण खातर ईमानदारी सूं काम करबा री बात कही। उपराष्ट्रपति जगदीप धनखड़ कोचिंग सेंटर्स री बढ़ती संख्या ने गंभीर संकट बताया। वे कया के या स्थिति चिंता रो विषय है। इण सूं निपटणो पडेला।