प्रधानमंत्री नरेन्द्र मोदी अहमदाबाद मांय गुरूवार ने व्ह्या विमान हादसा मांय ज़ख्मी लोगां सागे शुक्रवार ने मुलाकात कीनी। वे अहमदाबाद रा सिविल अस्पताल रो दौरो कर र हादसा मांय बच्या एकला मुसाफिर रमेश विश्वास कुमार ऊं ई मुलाकात कीनी। प्रधानमंत्री हादसा री ठौड़ रो ई दौरो कर र राहत रा काम मांय लाग्योड़ा अहलकारां सागे बातचीत कर र हालात रो जायजो लीनो। ईं पाछे प्रधानमंत्री अहमदाबाद मांय गुजरात रा मंत्रियां अर आला अहलकारां सागे मीटिंग कीनी। श्री मोदी हादसा मांय मर्या गुजरात रा पैली वाळा मुख्यमंत्री विजय रूपाणी रा पिरवार वाळां सागे ई मुलाकात कीनी। प्रधानमंत्री हादसा माथे गहरो दुःख जताता थकां कह्यो के पीड़ित पिरवारां रा दुःख अर नुकसाण ने म्हां भलीभांति समझां हां। इंर् बीचे गुजरात आतंकवाद निरोधी दस्तो अहमदाबाद विमान हादसा री ठौड़ ऊं एक डिजिटल वीडियो रिकॉर्डर बरामद कीनो है। हालांकि एयर इण्डिया हाल तांई ब्लैक बॉक्स मिलण री आधिकारिक तौर ऊं पुष्टि नी कीनी है। ईं बीचे हादसा मांय ज़ख्मी लोगां री जान बचावण सारू मोटी तादाद मांय लोग खून दान करण सारु सिविल अस्पताल पूग रह्या है। दूजी कानी हादसा मांय मरण वाळां री लाशां पोस्टमार्टम पाछे वां रा पिरवार वाळा या जाणकारां ने सूंपी जा रही है। लोकसभा अध्यक्ष ओम बिरला कह्यो है के पूरो देश ईं हादसा ऊं दुःखी है अर पीड़ित पिरवारां सागे सगळा री संवेदना है। श्री बिरला शुक्रवार ने वां रा संसदीय क्षेत्र कोटा-बूंदी मांय बूंदी जिला रा डाबी गांव मांय नानक भील रा शहादत दिवस रे मौके राख्यी ज्या कार्यक्रम मांय बोल रह्या हा।