प्रधानमंत्री नरेन्द्र मोदी कह्यो है के भारत ने विकसित बणावण मांय नारी-शक्ति री परिवर्तनकारी भूमिका व्हेला अर इण कारण सरकार लारले 11 बरसां सूं महिलावां रे नेतृत्व माथे बत्ती ध्यान दे री है। वणा कयो कि विज्ञान, शिक्षा, खेलकूद, स्टार्ट-अप अर सशस्त्र बल, हर खेतर मांय महिलावां चोखो प्रदर्शन कर र दूजां खातिर प्रेरणा-स्रोत बण री है।
राष्ट्रीय जनतांत्रिक गठबंधन-एनडीए सरकार रा 11 बरस पूरा होवण रे मौके माथे सोशल मीडिया पोस्ट मांय प्रधानमंत्री कयो कि एनडीए सरकार विकास मांय महिलावां री सशक्त भूमिका खातिर खास पहल करी है। इण मांय स्वच्छ भारत अभियान, जन-धन खातां रे ज़रिए वित्तीय समावेशन अर ज़मीनी स्तर माथे महिलावां रो सशक्तिकरण करणो भेळो है। श्री मोदी कयो के उज्ज्वला योजना सूं घरां ने धुआं-मुक्त बणाणे मांय मदद मिली है।
प्रधानमंत्री कह्यो के मुद्रा ऋण सूं लाखों महिलावां खातिर उद्यमी बणणे रो सुपणो पूरो व्हीयो है। प्रधानमंत्री आवास योजना रे तैत महिलावां रे नाम माथे मकान लेणे रे प्रावधान सूं महिलावां मांय सुरक्षा अर सशक्तिकरण री भावना बढ़ी है। श्री मोदी बेटी बचाओ-बेटी पढ़ाओ अभियान ने बालिका संरक्षण रो राष्ट्रीय अभियान बतायो।
प्रदेश मांय भी केन्द्र सरकार री जन कल्याणकारी योजनावां सूं घणी तादाद मांय किसान, युवा, महिला समेत न्यारा-न्यारा वर्ग लाभान्वित हो रिया है। सवाईमाधोपुर निवासी जयदीप सिंह राजावत प्रधानमंत्री सूर्य-घर-योजना ने खासो उपयोगी अर लाभदायक बतायो। इण योजना ने वणा जनकल्याणकारी योजना बताता थकां प्रधानमंत्री रो आभार जतायो।