प्रधानमंत्री नरेन्द्र मोदी हर राज्य मांय वैश्विक मानकां रे मुजब सैर-सपाटा री कम ऊं कम एक ठौड़ विकसित करण बाबत् कह्यो है। वे थावर ने नई दिल्ली मांय नीति आयोग री शासी परिषद री मीटिंग मांय बोल रह्या हा। श्री मोदी कह्यो के एक राज्य-एक वैश्विक गंतव्य रा तहत सगळा सुबीता अर बुनियादी ढांचा विकसित कर्या जावणा चाहिजे। प्रधानमंत्री कह्यो के ईं सारू सरकार अर सगळा राज्यां ने मिल र टीम इंडिया री तरह काम करणो व्हेला। मीटिंग मांय केई राज्यां रा मुख्यमंत्री, केंद्र रा राज वाळा प्रदेशां रा उपराज्यपाल, केंद्रीय मंत्री अर नीति आयोग रा उपाध्यक्ष, सदस्य अर सी.ई.ओ. ई मौजूद रह्या। ईं साल रा मुद्दो-2047 तक विकसित भारत के लिए विकसित राज्य है। मुख्यमंत्री भजन लाल शर्मा ई भारत मण्डपम मांय व्ही ईं मीटिंग मांय सिरकत कीनी। वे विकसित राजस्थान रो संकल्प पूरो करण सारू करी जा रही कोशिशां री चर्चा कीनी। ईं दौरान वे प्रदेश मांय पाणी अर बिजली री सुरक्षा तैय करण बाबत् केन्द्र सरकार ऊं और मदद री अरज कीनी। मुख्यमंत्री पौंग बंधा मांय पाणी भरण रा बारा मांय बेगो ई फैसलो करण री अरज कीनी ताकि भागीदार राज्यां ने वां री पांती रो पाणी मिल सके। वे ईं सागे ई कालीसिंध अर छबड़ा थर्मल परियोजनावां री और इकाईयां लगावण सारू नियमां मांय ढील देवण री ई मांग कीनी।