प्रधानमंत्री नरेंद्र मोदी कह्यो है के देश माथे व्हेवण वाळा हर आतंकी हमला री पाकिस्तान ने कीमत चुकाणी पड़ेला। वे आज बीकानेर कने पलाना मांय राख्यी ज्यी जनसभा मांय 26 हजार करोड़ रुप्या रा खर्च वाळी न्यारी-न्यारी परियोजनावां रा काम री नींव रखण अर पूरा व्ह्या कामां रो उद्घाटन कर्यां पाछे बोल रह्या हा। श्री मोदी कह्यो के पाकिस्तान भारत ऊं कदे ई सीधी लड़ाई मांय जीत हासिल नी कर सक्यो , ईं कारण वो आतंकवाद ने भारत रे खिलाफ लड़ाई रो हथियार बणायो। प्रधानमंत्री कह्यो के ओ बर्दाश्त नी कर्यो जावेला। प्रधानमंत्री कह्यो के पाकिस्तान आज़ादी पाछे ऊं ई लगातार भारत मांय आतंकवाद फैलातो रह्यो है , पण अब ऐड़ी वारदातां री कीमत पाकिस्तान री फौज अर वठे री माली व्यवस्था ने चुकावणी व्हेला। श्री मोदी कह्यो के पाकिस्तान सागे अब न तो कारोबार न ही बातचीत करी जावेला। वे कह्यो के गर बात व्हेला तो पाकिस्तान रा कब्ज़ा वाळा कश्मीर परां।प्रधानमंत्री कह्यो के ओ भारत रो संकल्प है अर दुनिया री कोई ताकत म्हां ने ईं संकल्प ऊं नी डिगा सके है। श्री मोदी कह्यो के ऑपरेशन सिंदूर आतंकवाद रो सामो करण रा तीन सूत्र तय कर दीना है। पहलो- भारत माथे आंतकी हमलो व्ह्यो तो करड़ो जवाब दियो जावेला। समय अर तरीको म्हाणी फौज तैय करेला अर शर्तां ई म्हाणी व्हेला। दूजो- भारत एटम बम री गीदड़ भभकियां ऊं डरबा वाळो नी है अर तीजो- भारत आतंकवाद अर आतंकवाद री हिमायत करण वाळी सरकारां ने न्यारा नी मानेला, वां ने एक ही मान्या जावेला। श्री मोदी कह्यो के पाकिस्तान रा आंतकवाद री दुनिया मांय पोल खोलण सारु भारत रा सात प्रतिनिधिमंडल आं दिनां पूरी दुनिया मांय पूग रह्या है। श्री मोदी पहलगाम रा वाकया रो जिकर करता थकां कह्यो के 22 तारीख रा हमला रा जवाब मांय भारत री फौज 22 मिनट मांय आंतकियां रा 9 सब ऊं मोटा ठिकाणा तबाह कर दीना। वे कह्यो के दुनिया अर देश रा दुश्मन ई देख लीनो है के जद सिंदूर, बारूद बण जावे है तो वां रो कांई नतीजो व्हे है। प्रधानमंत्री कह्यो के विकसित भारत बणावण सारु देश मांय बुनियादी ढ़ांचा ने और बेहतर बणावण सारु काम चाल रह्यो है। वे कह्यो के देश रा रेलवे टेशनां, हाई-वे अर हवाई अड्डां माथे नुवा ज़माना रा सुबीता मुहैया करावण सारु तेज़ी ऊं काम कर्यो जा रह्यो है। श्री मोदी कह्यो के बुनियादी ढ़ांचा ने और बेहतर बणावण रा कामां माथे पैली री तुलना मांय छह गुणा बत्तो खर्च कर्यो जा रह्यो है। श्री मोदी कह्यो के बुनियादी ढ़ांचो मज़बूत बणावण रा आं कामां ने देख र दुनिया ई हैरान है। रेलां रा नुवा नेटवर्क रो जिक्र करता थकां श्री मोदी कह्यो के रेलवे ऊं जुड़्या बुनियादी ढ़ांचा ने और बेहतर बणावण सारु नुवी गति दी जा रही है। श्री मोदी कह्यो के देश मांय एक सौ ऊं बत्ता अमृत स्टेशन विकसित कर्या जा चुक्या है, ज्यां माथे विकास सागे विरासत रो अनोखो मेल निजर आवेला, जिण ऊं सैर-सपाटा अर नौकरी-धंधां ने बधावो मिलेला। प्रधानमंत्री राजस्थान रो जिकर करता थकां कह्यो के लारला 11 साल मांय न्यारा-न्यारा कामां सारु केन्द्र सरकार री ओर ऊं एकला राजस्थान मांय 70 हजार करोड़ रुप्या खर्च करी ज्या। प्रधानमंत्री देशभर मांय और बेहतर बणायी ज्या 103 रेलवे टेशनां रो देशनोक रेलवे टेशन ऊं उद्घाटन कीनो अर बीकानेर-मुबंई एक्सप्रेस रेलगाड़ी ने हरी झंडी बता र रवाना कीनी। इण ऊं पैली प्रधानमंत्री देशनोक रा करणी माता मिन्दर मांय पूजा-अर्चना कीनी। कार्यक्रम मांय केन्द्रीय मंत्री अर्जुनराम मेघवाल अर अश्विनी वैष्णव ई संबोधित कीना। मुख्यमंत्री भजनलाल शर्मा वां रा संबोधन मांय प्रदेश ने दीरीजी सौगातां सारु प्रधानमंत्री रो धन्यवाद कीनो।।