प्रधानमंत्री नरेन्द्र मोदी रो गुरूवार ने बीकानेर ज़िला ऊं 26 हजार करोड़ रूप्या ऊं बत्ता खर्च वाळी विकास री केई परियोजनावां देश ने समर्पित करण रो कार्यक्रम है। वे देश रा और बेहतर बणायी ज्या 103 अमृत रेलवे टेशनां रो उद्घाटन करेला। प्रदेश रा 8 टेशनां देशनोक, बूंदी, मांडलगढ़, गोविंदगढ़, गोगामेड़ी, मंडावर-महुआ रोड़, फतेहपुर शेखावाटी और राजगढ़ माथे अमृत भारत स्टेशन योजना रा तैत केई नुवा सुबीता मुहैया करायी ज्या है। कार्यक्रम रे दौरान श्री मोदी बीकानेर-मुंबई एक्सप्रेस रेल ने झंडी बता र रवाना करेला अर चुरू-सादुलपुर रेल लाइन री नींव रखेला। वे सूरतगढ-फलौदी, फुलेरा-डेगाना, उदयपुर-हिम्मतनगर, फलौदी-जैसलमेर अर समदड़ी-बाड़मेर रेल लाइन ने बिजली ऊं चालण वाळी गाड़ियां लायक बणावण री परियोजनावां रो उद्घाटन ई करेला। श्री मोदी चार हजार 850 करोड़ रुप्या ऊं बत्ता खर्च वाळी सात सड़क परियोजनावां ई जनता ने सूंपेला। अक्षय ऊर्जा काम लेवण ने बधावो देवण सारू प्रधानमंत्री बीकानेर अर नावां मांय सूरज री रोशनी ऊं बिजली बणावण समेत न्यारी-न्यारी बिजली परियोजनावां रा काम री नींव रखेला। श्री मोदी राज्य सरकार री खास 25 परियोजनावां री नींव रखेला अर पूरा व्ह्या कामां रो उद्घाटन करेला। प्रधानमंत्री राज्य मांय स्वास्थ्य ऊं जुड़्या बुनियादी ढांचा ने और बेहतर बणावण री कड़ी मांय राजसमंद, प्रतापगढ़, भीलवाड़ा अर धौलपुर मांय नर्सिंग कॉलेजां रो ई उद्घाटन करेला। प्रधानमंत्री रो बीकानेर ज़िला रा पलाना मांय जनसभा ने संबोधित करण रो ई कार्यक्रम है। मुख्यमंत्री भजनलाल शर्मा ई गुरूवार ने बीकानेर पूग ग्या। प्रधानमंत्री री सभा री तैयारियां रो जायज़ो लेवण सारू गुरूवार ने मुख्य सचिव सुधांश पंत अर पुलिस महानिदेशक यू आर साहू सभा ठौड़ रो दौरो कर र अहलकारां ने ज़रूरी हुकम दीना।