प्रधानमंत्री नरेन्द्र मोदी रो 22 मई ने बीकानेर रा दौरा सारू पधारण रो कार्यक्रम है। श्री मोदी देशनोक ऊं अमृत भारत स्टेशन योजना रा तैत देशभर मांय बणायी ज्या नुवा रेलवे टेशनां ने डिज़िटल तरीका ऊं जनता ने सूंपेला। ईं दौरान वां रो आम सभा ने सम्बोधित करण रो ई कार्यक्रम है। ईं मौके मुख्यमंत्री भजन लाल शर्मा, रेल मंत्री अश्विनी वैष्णव अर केन्द्रीय मंत्री अर्जुनराम मेघवाल ई मौजूद रेहवेला। प्रधानमंत्री रो नाल हवाई अड्डा माथे फौज रा जवानां सागे बातचीत करण अर देशनोक रा करणी माता मिन्दर मांय दर्शन करण रो ई कार्यक्रम है। प्रधानमंत्री रा प्रस्तावित दौरा ने ध्यान राखता थकां प्रशासन सगळी ज़रूरी तैयारियां कर रह्यो है। मुख्य सचिव सुधांश पंत शुक्रवार ने जयपुर मांय अहलकारां री मीटिंग ले र सगळी ज़रूरी तैयारियां टेमसर पूरी करण रा हुकम दीना।