प्रधानमंत्री नरेंद्र मोदी कह्यो है के सशस्त्र बल देश रा गौरव ने नुवी ऊंचाई तांई पूगायो है जो अभूतपूर्व, अकल्पनीय अर असाधारण है। वे कह्यो के ऑपरेशन सिंदूर देश रो मनोबल बधायो है अर देश रो एको बणायो राख्यो है। श्री मोदी मंगलवार ने पंजाब रा आदमपुर वायुसेना टेशन माथे जवानां सामी भाषण दे रह्या हा। प्रधानमंत्री कह्यो के वायुसेना पाकिस्तान रा हलका मांय आतंकी ठिकाणां माथे केवल 20 ऊं 25 मिनट मांय हमलो कर र ओ बतायो है के नुवी तकनीक वाळो एक पेशेवर बल ही ऐड़ो कर सके है। श्री मोदी पाकिस्तान ने करड़ो संदेश देता थकां कह्यो के अब भारत रे खिलाफ आतंकी हमलो व्हेवण री सूरत मांय देश खुद रा लेवल माथे जवाब देवेला। प्रधानमंत्री कह्यो के देश किण ई भांत री न्यूक्लीयर धमकी सहन नी करेला। इण ऊं पैली श्री मोदी संवारे आदमपुर वायुसेना हलका रो दौरो कर र जवानां सागे बातचीत कीनी। रक्षा मंत्री राजनाथ सिंह मंगलवार ने नई दिल्ली मांय आला दर्जा री मीटिंग मांय देश री आतूणी सरहद माथे हिफाज़ती इन्तज़ामात अर हालात रो जायजो लीनो।