प्रधानमंत्री नरेंद्र मोदी रो राष्ट्रीय गीत ‘वंदे मातरम’ रा डोढ़ सौ साल पूरा व्हेवण रा सिलसिला मांय एक साल चालण वाळा स्मरणोत्सव रो शुक्रवार ने नई दिल्ली मांय उद्घाटन करण रो कार्यक्रम है। संस्कृति मंत्रालय री ओर ऊं ओ कार्यक्रम आवता साल 7 नवम्बर तांई चलायो जावेला। उद्घाटन कार्यक्रम मांय ‘वंदे मातरम’ रा डोढ़ सौ साल रा इतिहास रा बारा मांय प्रदर्शनी लगायी जावेला। ईं सागे ई एक नान्ही फिल्म बतायी जावेला अर स्मारक डाक टिकट अर यादगार सिक्को ई जारी कर्यो जावेला। प्रदेश मांय ई ईं सिलसिला मांय कार्यक्रम राख्या जावेला। राज्य स्तर रो आयोजन जयपुर रा सवाईमानसिंह स्टेडियम मांय व्हेला। ज़िला मुख्यालयां माथे ई राष्ट्रीय गीत वन्दे मातरम् री वर्षगांठ जळसा सागे मनायी जावेला। ईं सिलसिला मांय सगळी सरकारी स्कूलां अर पंचायती राज विभाग रा सगळा दफ्तरां रो काम काल ऊं वन्दे मातरम गीत सागे सरू व्हेला, जदके सिंज्या री पोर छुट्टी ऊं पैली राष्ट्र गान ’जन गण मन’ गायो जावेला। शिक्षा अर पंचायती राज मंत्री मदन दिलावर कह्यो के ईं फैसला ऊं देश प्रेम री भावना बधेला। ईं सागे ई राज्य री सगळी स्कूलां मांय राष्ट्र गान वंदे मातरम् री डोढ़ सौं वीं वर्षगांठ रे मौके देशभक्ति ऊं जुड़्या न्यारा-न्यारा कार्यक्रम राखण रा हुकम दिया ज्या है। शिक्षा निदेशालय रे मुजब राज्य, ज़िला अर ब्लॉक लेवल माथे जनता रा नुमाइंदा, अहलकार, विद्यार्थी, अध्यापक अर विद्यार्थियां रा मायतां री भागीदारी ऊं वंदे मातरम गीत रा बारा मांय वाद-विवाद, निबंध लेखन, देशभक्ति गीत, सांस्कृतिक कार्यक्रम राख्या जावेला अर रैलियां निकाळी जावेला।