प्रधानमंत्री नरेंद्र मोदी गुरूवार ने बांसवाड़ा मांय विकास री 1 लाख 22 हजार करोड रुप्या ऊं बत्ता खर्च वाळी न्यारी-न्यारी परियोजनावां रा काम री नींव रखी अर पूरा व्ह्या काम जनता ने सूंप्या। श्री मोदी बांसवाड़ा कने नापला मांय माही बांसवाड़ा राजस्थान परमाणु ऊर्जा परियोजना रा काम री नींव रखी। 42 हजार करोड़ रूप्या रा खर्च वाळी ईं परियोजना रा तैत परमाणु ऊर्जा पैदा करण री 700 मेगावाट बूता री चार इकाइयां लगायी जावेला। ईं सागे ई प्रधानमंत्री सूरज री रोशनी ऊँ बिजली बणावण, पीवण रा पाणी, ईलाज, बुनियादी ढ़ांचा विकास अर हाई-वे बणावण समेत विकास री केई परियोजनावां रा काम री नींव रखी अर पूरा व्ह्या काम जनता ने सूंप्या। श्री मोदी प्रदेश मांय चालण वाळी तीन नुवी रेल गाड़ियां ने ई वर्चुअल तरीका ऊँ हरी झंडी बता र रवाना कीनी। ईं पाछे जनसभा मांय श्री मोदी कह्यो के राजस्थान री धरती ऊँ ऊर्जा हलका मांय देश री काबिलियत रो नुवो पाठ लिख्यो जा रह्यो है। वे कह्यो के आज न्यारा-न्यारा राज्यां मांय बिजली बणावण री 90 हजार करोड़ रूप्या ऊँ बत्ता खर्च वाळी परियोजनावां सरू व्हे रही है, जो बतावे है के देश बिजली री रफ्तार ऊँ आगे बढ़ रह्यो है अर ईं रफ्तार मांय देश रा सगळा हिस्सा शामिल है।
प्रधानमंत्री कह्यो के सौर ऊर्जा ऊँ परमाणु ऊर्जा तांई देश बिजली बणावण रा बूता ने नुवी ऊँचाइयां तांई पूगा रह्यो है। श्री मोदी मौजूदा दौर मांय बिजली रा महत्त्व रो जिक्र करता थकां कह्यो के साल 2014 पाछे देश मांय बिजली रा हलका मांय ज़बरदस्त काम व्ह्यो है। वे कह्यो के 21वीं सदी मांय विकास करण री मंशा राखण वाळा देशां ने बिजली रो उत्पादन बधावणो ही व्हेला। श्री मोदी कह्यो के वां री सरकार रा राज मांय साफ़ ऊर्जा ने जनता रो अन्दोलन बणा र काम कर्यो जा रह्यो है। प्रधानमंत्री कह्यो के राजस्थान मांय भाजपा री मौजूदा सरकार प्रदेश रा विकास सारू ईमानदारी ऊँ काम कर रही है। श्री मोदी राज्य मांय लारली सरकार री बगत पेपरलीक, भ्रष्टाचार अर कानून-व्यवस्था रा हालात रो जिक्र करता थकां कह्यो के राज्य री मौजूदा सरकार प्रदेश री जनता रा भला सारू लगातार काम कर रही है।
श्री मोदी कांग्रेस माथे आदिवासियां रा मुद्दां माथे ध्यान नी देवण रो आरोप माण्डता थकां कह्यो के भारतीय जनता पार्टी हमेशा आदिवासियां रा भला सारू काम कीनो है। प्रधानमंत्री जनजातियां रा भला सारू चलाई जा रही न्यारी-न्यारी योजनावां रो जिक्र करता थकां कह्यो के वे आदिवासी समाज रा स्वाभिमान अर संस्कृति री हिफाजत करणो तैय कीनो है। हाल ही मांय करी ज्या जीएसटी सुधारां री चर्चा करता थकां श्री मोदी कह्यो के आं सुधारां ऊँ रोजीना काम आवण वाळी घणखर चीजां सस्ती व्हे ग्यी है अर रसोई रो खर्च कम व्हे ग्यो है। श्री मोदी विपख माथे जीएसटी रा बारा मांय भ्रम फैलावण रो आरोप माण्डता थकां कह्यो के जीएसटी मांय करी ज्या सुधारां ऊँ समाज रा हर तबका ने साता मिलेला अर हर परिवार रा खर्च मांय अच्छी-खासी कमी व्हेला। खुद रे पाण ऊबा भारत रो संकल्प दोहराता थकां प्रधानमंत्री जनता ऊँ देशी सामान बेचण अर खरीदी करण रो संकल्प लेवण री अपील कीनी। ’स्वदेशी’ ने परिभाषित करता थकां श्री मोदी कह्यो के देश मांय बणबा वाळो हर सामान, जिण मांय देश री जनता रो पसीनो लाग्योड़ो है वो स्वदेशी है। वे कह्यो के म्हां ने स्वदेशी ने खुद रो मान बणावणो है।