प्रधानमंत्री नरेंद्र मोदी रो गुरूवार ने बांसवाड़ा कने नापला मांय 2 हजार 800 मेगावाट बूता री माही बांसवाड़ा परमाणु विद्युत परियोजना रा काम री नीव रखण रो कार्यक्रम है। माही बंधा कने बणबा वाळी आ परियोजना परमाणु ऊर्जा मिशन रा तैत तैयार करी जावेला। ईं परियोजना माथे करीब 42 हजार करोड़ रुप्या रो खर्च आवेला। प्रधानमंत्री मोदी जनता ने 1 लाख 8 हजार करोड़ रूप्या रा खर्च वाळा विकास रा न्यारा-न्यारा कामां री सौगात ई देवेला। आं मांय राज्य सरकार रा 30 हजार करोड़ रूप्या रा खर्च वाळा विकास रा 48 काम ईं शामिल है। श्री मोदी इण ई कार्यक्रम रे दौरान बीकानेर-दिल्ली कैंट अर जोधपुर-दिल्ली कैंट बीचे चलायी जावण वाळी वंदे भारत एक्सप्रेस अर उदयपुर-चंडीगढ़ एक्सप्रेस रेलगाड़ी ने हरी झंडी बता र रवाना करेला। प्रधानमंत्री ईं मौके जनसभा ने ई संबोधित करेला। इण ई सिलसिला मांय जोधपुर मांय राख्या जावण वाळा जळसा मांय रेल मंत्री अश्विनी वैष्णव अर संस्कृति अर पर्यटन मंत्री गजेन्द्र सिंह शेखावत मौजूद रेहवेला, जद के बीकानेर मांय राख्या जावण वाळा कार्यक्रम मांय केन्द्रीय कानून मंत्री अर्जुन राम मेघवाल मौजूद रहवेला। ईं बीचे प्रधानमंत्री रा कार्यक्रम सारू बांसवाड़ा मांय मोटा पैमाना माथे तैयारियां करी जा रही है। कार्यक्रम री तैयारियां रो जायज़ो लेवण सारू मुख्यमंत्री भजन लाल शर्मा बुधवार ने दोपहर बांसवाड़ा पूग्या। श्री शर्मा नापला मांय माही बांसवाड़ा राजस्थान परमाणु बिजलीघर री नींव रखण री ठौड़ अर सभा री ठौड़ रो दौरो कर र ज़रूरी व्यवस्थावां अर तैयारियां रो जायजो लीनो अर अहलकारां ने ज़रूरी हुकम दीना।