प्रधानमंत्री नरेंद्र मोदी रा 25 सितम्बर ने बांसवाड़ा रा प्रस्तावित दौरा री तैयारियां रो जायज़ो लेवण सारु मुख्यमंत्री भजनलाल शर्मा थावर ने बांसवाड़ा पूग्या। मुख्यमंत्री छोटी सरवन रा नापला गाँव मांय माही बांसवाड़ा परमाणु ऊर्जा परियोजना री प्रस्तावित ठौड़, जठे प्रधानमंत्री ईं परियोजना रा काम री नींव रखेला, रो दौरो कीनो। वे सभा री ठौड़ अर दौरा ऊं जुड़ी व्यवस्थावां रो जायज़ो लीनो अर ज़रुरी हुकम दीना। ईं दौरान जनजातीय क्षेत्र विकास मंत्री बाबूलाल खराड़ी, जनता रा नुमाइंदा, मुख्य सचिव सुधांश पंत, पुलिस महानिदेशक राजीव शर्मा अर दूजा अहलकार ई मौजूद रह्या। मुख्यमंत्री भारतीय जनता पार्टी रा अहलकारां अर कार्यकर्तावां सागे ई मुलाकात कर र कार्यक्रम री व्यवस्थावां रा बारा मांय चर्चा कीनी। मुख्यमंत्री बांसवाड़ा रा कुशलबाग स्टेडियम मांय लगायी ज्या शहरी सेवा शिविर रो दौरो कीनो अर पात्र लोगां ने नि-क्षय पोषण किट, चैक अर सर्टिफिकेट बांट्या। ईं मौके वे कह्यो के प्रधानमंत्री नरेन्द्र मोदी रा जन्मदिवस रा सिलसिला मांय राख्या जा रह्या कार्यक्रमां रा तैत पूरा राज्य मांय लगाया जा रह्या शहरी अर ग्रामीण सेवा शिविरां मांय अंत्योदय री भावना सांची व्हे रही है अर जनता ने प्रमाण पत्र, पेंशन अर राशन कार्ड सरीखा सुबीता तुरत मिल रह्या है। मुख्यमंत्री कह्यो के टी.बी. मुक्त भारत अभियान रा तैत लगाया जा रह्या शिविरां मांय स्वास्थ्य जांच, मातृ अर शिशु स्वास्थ्य, एनीमिया, टी.बी. अर सिकल सेल सरीखी बीमारियां री जांच अर ईलाज रा सुबीता मुहैया कराया जा रह्या है। ग्रामीण शिविरां मांय स्वामित्व पट्टा बांटण, गिरदावरी अर ढ़ांढ़ा-ढ़ोरां रे टीका लगावण सरीखा सुबीता ई दिया जा रह्या है। श्री शर्मा कह्यो के मुख्यमंत्री आयुष्मान आरोग्य योजना ऊं हर पिरवार ने 25 लाख रुप्या तांई रो मुफ़्त ईलाज मिल रह्यो है अर किसानां-पशुपालकां ने किसान सम्मान निधि अर गौपाल क्रेडिट कार्ड योजना रे ज़रिए मज़बूत बणाया जा रह्या है।