प्रधानमंत्री नरेंद्र मोदी रा जन्मदिवस रे मौके बुधवार ऊँ सेवा पर्व सरू कर्यो जावेला। उपमुख्यमंत्री दिया कुमारी आज करौली ज़िला रा पदमपुरा गांव मांय बणायी ज्यो नुवो प्राथमिक स्वास्थ्य केन्द्र जनता ने सूंपण रे मौके राख्यी ज्या कार्यक्रम मांय आ जाणकारी दीनी। वे बतायो के 2 अक्टूबर तांई चालण वाळा सेवा पर्व रे दौरान जनता री परेशानियां तुरत निपटायी जावेला अर जनता रा भला री योजनावां रो फायदो हर जरूरतमंद जणा तांई पूगायो जावेला। दिया कुमारी कह्यो के पदमपुरा गांव मांय बण्या ईं स्वास्थ्य केन्द्र ऊँ गांव वाळां ने टेमसर ईलाज मिल सकेला। ईं मौके उपमुख्यमंत्री सड़क बणावण रो ऐलाण ई कीनो। लोकसभा अध्यक्ष ओम बिरला रो बुधवार ऊँ कोटा-बून्दी संसदीय हलका रा नौ दिन रा दौरा रो कार्यक्रम है। श्री बिरला प्रधानमंत्री नरेन्द्र मोदी रा जन्मदिन रे मौके राख्या जावण वाळा न्यारा-न्यारा कार्यक्रमां मांय शामिल व्हेला। लोकसभा अध्यक्ष शक्तिनगर मांय राख्या जावण वाळा स्वच्छता अभियान कार्यक्रम मांय ई शामिल व्हेला। ईं पाछे वां रो थेकड़ा मांय नमो स्वास्थ्य जांच अर सुपोषण शिविर मांय शामिल व्हेवण रो कार्यक्रम है। लोकसभा अध्यक्ष रामगंजमण्डी मांय सुपोषित माँ अभियान रा तीजा दौर री सरूआत करेला। ईं दौरान आस वाळी केई लुगाइयां ने पोषण किट बांट्या जावेला।