प्रधानमंत्री नरेंद्र मोदी कह्यो है के भारत मज़बूत सेमीकंडक्टर इकोसिस्टम विकसित कर रह्यो है, जो देश ने खुद रे पाण ऊबो करेला अर दुनिया मांय होड़ मांय लावेला। श्री मोदी मंगलवार ने नई दिल्ली मांय सेमीकॉन इंडिया 2025 रा उद्घाटन रे मौके बोल रह्या हा। वे कह्यो के आवता बगत मांय भारत मांय बणबा वाळी सब ऊं छोटी चिप दुनिया मांय मोटा बदलाव लावेला। श्री मोदी कह्यो के दुनिया मांय सेमीकंडक्टर रो बाज़ार छह सौ अरब डॉलर तांई पूग ग्यो है अर आवता बगत मांय इण रे एक ट्रिलियन डॉलर रा लेवल ने पार कर जावण रा आसार है। वे भरोसो जतायो के भारत ईं बाज़ार मांय खास भागीदार बणेला। कार्यक्रम मांय इलेक्ट्रॉनिक्स अर सूचना प्रौद्योगिकी मंत्री अश्विनी वैष्णव कह्यो के देश मांय सेमीकंडक्टर बणावण रा पांच कारखाना बणावण रो काम चाल रह्यो है। वे कह्यो के ऐड़ा दो और कारखाना कुछ महीना मांय काम सरू कर देवेला। ईं मौके श्री वैष्णव प्रधानमंत्री ने भारत मांय बणी पहली चिप भेंट कीनी। मंगलवार ने सरू व्ह्या तीन दिन रा ईं सम्मेलन मांय मज़बूत अर टिकाऊ सेमीकंडक्टर इकोसिस्टम ने आगे बधावण माथे विचार कर्यो जा रह्यो है। प्रधानमंत्री रो काल सीईओ गोलमेज सम्मेलन मांय ई शामिल व्हेवण रो कार्यक्रम है।