प्रधानमंत्री नरेंद्र मोदी देश री हिफाज़त ऊं जुड्या हाल रा वाकयां ने ध्यान राखता थकां गुरूवार ने न्यारा-न्यारा मंत्रालयां अर विभागां रा सचिवां सागे मीटिंग कीनी। मीटिंग मांय प्रधानमंत्री मौजूदा हालात मांय मंत्रालयां री योजना अर तैयारी रो जायजो लीनो अर मंत्रालयां ने राज्यां रा अहलकारां अर ज़मीनी स्तर री संस्थावां सागे तालमेल राखण बाबत् कह्यो। प्रधानमंत्री देश रे संवेदनशील दौर ऊं निकळबा रे दौरान लगातार सावचेती, तालमेल अर साफ तरीका ऊं जाणकारियां लेवण-देवण सारू कह्यो। मीटिंग मांय कैबिनेट सचिव, प्रधानमंत्री रा दफ्तर रा आला अहलकार, रक्षा, गृह, विदेश, सूचना अर प्रसारण, बिजली, स्वास्थ्य अर दूरसंचार समेत खास-खास मंत्रालयां रा सचिव शिरकत कीनी। फौज कानी ऊं चलायी ज्या ऑपरेशन सिंदूर रा बारा मांय जाणकारी देवण सारु गुरूवार ने संसद भवन मांय सगळी सियासी पार्टियां री मीटिंग बुलायी ज्यी। रक्षामंत्री राजनाथ सिंह री सदारत मांय व्ही मीटिंग मांय श्री सिंह पाकिस्तान अर वां रा कब्जा वाळा कश्मीर मांय नौ आतंकी ठिकाणां माथे भारत री कार्रवाई रा बारा मांय जाणकारी दीनी। मीटिंग मांय सियासी पार्टियां रा नुमाइन्दा आतंकवाद रे खिलाफ़ भारत री फौज री कार्रवाई री सराहवणा करता थकां एक राय ऊं इण री हिमायत करी ज्यी। खबरनवीसां सागे बातचीत करता थकां संसदीय कार्यमंत्री किरेन रिजिजू मीटिंग ने रचनात्मक बताता थकां कह्यो के हर नेता देश सामी मौजूदा चुनौती ने समझता थकां ज़िम्मेदारी सागे विचार बताया। कांग्रेस रा अध्यक्ष मल्लिकार्जुन खड़गे कह्यो के ईं मुद्दा माथे वां री पार्टी सरकार री पूरी हिमायत करे है। लोकसभा मांय विपख रा नेता राहुल गांधी ई एड़ी ही बात कही। मीटिंग मांय गृह मंत्री अमित शाह, विदेश मंत्री डॉ. एस. जयशंकर, राज्यसभा मांय सदन रा नेता जे.पी. नड्डा, समाजवादी पार्टी रा राम गोपाल यादव, तृणमूल कांग्रेस रा सुदीप बंदोपाध्याय, द्रविड़ मुनैत्र कड़गम रा टी.आर. बालू, लोक जनशक्ति पार्टी रा चिराग पासवान समेत तेलुगूदेशम, जनता दल युनाइटेड, राष्ट्रवादी कांग्रेस पार्टी, शिवसेना, सीपीआईएम, बीजू जनता दल अर राष्ट्रीय जनता दल रा नेतावां समेत केई नेता सिरकत कीनी।
रक्षामंत्री राजनाथ सिंह भारत री फौज री बहादुरी री सराहवणा करता थकां कह्यो है के देश ने फौज माथे नाज़ है। वे गुरूवार ने नई दिल्ली मांय राख्यी ज्या राष्ट्रीय गुणवत्ता सम्मेलन मांय बोल रह्या हा। रक्षामंत्री फौज कानी ऊं चलायी ज्या ऑपरेशन सिंदूर ने माथो ऊंचो करण वाळो बताता थकां कह्यो के गर कोई म्हाणा धीरज री परीक्षा लेवे है तो वां ने भारत री कार्यवाही सामो करण सारू तैयार रेहवणो चाहिजे।
पाकिस्तान री ओर ऊं बीती रात देश रा उत्तराद अर आतूणी एयरबेस समेत केई फौजी ठिकाणां माथे हमला री कोशिश ने भारत रो एयर डिफेंस सिस्टम नाकाम कर दीनो। सरहद पार ऊं राजस्थान रा उत्तरलाई, फलौदी अर नाल एयरबेस समेत देश रा 15 एयरबेस अवंतिपुरा, श्रीनगर, जम्मू, पठानकोट, अमृतसर, कपूरथला, जालंधर, लुधियाना, आदमपुर, बटिंढ़ा, चंडीगढ़ अर भुज एयरबेस माथे हमलो करण री कोशिश करीजी। हमला ने इंटिग्रेटेड काउंटर यूएएस ग्रिड अर वायु रक्षा प्रणालियां बेअसर कर दीना। पाकिस्तान री ओर ऊं प्रदेश रा उत्तरलाई, फलौदी अर नाल अड्डा माथे हवाई हमला री नाकाम कोशिश बीचे प्रशासन लोगां ऊं सावचेत रेहवण अर झूठी खबरां अर अफवाहां माथे ध्यान नी देवण री अपील कीनी है। म्हाणा बाड़मेर खबरनवीस बतायो के शहर मांय पुलिस री गश्त बधा दीरीजी है अर उत्तरलाई ओड़ी जनता रो प्रवेश रोक दियो ज्यो है। म्हाणा फलौदी खबरनवीस बतायो के वठे हाल रा घटनाक्रम पाछे जनता री आवण-जावण री ठोड़ां और जवान तैनात करी ज्या है अर आपदा प्रबंधन दलां ने अलर्ट मोड माथे राख्यी ज्या है। पाकिस्तान रे खिलाफ़ काल सरु करी ज्यी भारत री कार्रवाई पाछे राज्य सरकार पूरी सावचेती राख रही है। गृह विभाग सगळा जिला कलेक्टरां अर एस.पी. ने गाइडलाइन जारी कर र आपदा प्रबंधन ऊं जुड़ी तैयारियां मज़बूत करण रा हुकम दीना है। कलेक्टरां ऊं आपात हालात मांय अस्पतालां मांय दवाइयां री उपलब्धता तैय करण, ईलाज ऊं जुड़्या कर्मचारियां ने ड्यूटी माथे तैयार रेहवण अर ब्लड बैंकां मांय हर भांत रा ब्लड ग्रुप री ज़रुरी तादाद राखण सारु कही ज्यो है। ईं सागे ई अस्थायी अस्पताल अर राहत शिविर बणाया जावण लायक स्कूलां री पिछाण करण बाबत् ई कही ज्यो है।
सरकार सोशल मीडिया माथे निगराणी बधावण रा ई हुकम दीना है। पुलिस ने देश विरोधी अर भड़कावण वाळा पोस्ट करण वाळां रे खिलाफ़ तुरत कार्रवाई करण रा हुकम दिया ज्या है। गाइडलाइन मांय रोजमर्रा रा सामान अर सेवावां ने चालू राखण अर कालाबाजारी माथे ई निजर राखण बाबत् कही ज्यो है। राज्य रा सरहदी ज़िलां रा कलेक्टरां अर पुलिस रा अहलकारां ने फौज अर दूजी केन्द्रीय एजेंसियां रा अहलकारां सागे लगातार संपर्क अर तालमेल राखण सारु ई कही ज्यो है। सरकार पाकिस्तान री सरहद ऊं लाग्योड़ा गांवां सारु ई आपातकालीन निकासी योजना तैयार राखण रा हुकम दिया ज्या है। किण ई भांत रा हमला रा हालात मांय आं गांवां ऊं जनता ने हिफ़ाज़त सागे निकाळबा सारु पूरी योजना अर साधन तैयार राखण सारु कही ज्यो है। आपात हालात मांय सामाजिक संगठनां, एनएसएस रा खुदसेवकां अर एनसीसी कैडेट्स री मदद लेवण सारु ई कही ज्यो है। सरकार जनता ऊं संयम राखण अर ज़रूरी तैयारी राखण री अपील कीनी है। ईं बीच प्रदेश रा सरहदी ज़िलां मांय स्कूल-कॉलेज बंद रहया, जदके जोधपुर अर बीकानेर समेत कुछ शहरां ऊं उड़ानां टाळ दीरीजी। जयपुर हवाई अड्डा ऊं ई कुछ उड़ानां रद्द कर दीरीजी।