प्रदेष मांय जोरदार ठारी पड़ रही है। बुधवार ने जयपुर, कोटा, बीकानेर, अजमेर, भरतपुर अर उदयपुर संभाग रा कुछ हलकां मांय घणी धुंअर रही। केई ठौड़ां पारो चार ऊं आठ डिग्री सेल्सियस तांई उतर्यो। घणखर ठौड़ां दिन रा तापमान मांय ई गिरावट आयी। अधिकांष ठौड़ां रात री बगत पारो 4 ऊं 10 डिग्री सेल्सियस बीचे, जदके दिन मांय 25 डिग्री सेल्सियस ऊं कम दर्ज करी ज्यो। झुन्झुनूं ज़िला रो पिलानी राज्य मांय सब ऊं ठण्डी ठौड़ रह्यो। सिरोही जिला रा माउंट आबू मांय पारो शून्य ऊं एक डिग्री सेल्सियस नीचे उतर ग्यो। म्हाणा सिरोही खबरनवीस बतायो के वठे आज संवारे बर्फ री हल्की परत निजर आयी।
ईं बीचे पूरा राज्य मांय घणी धुंध ऊं हवाई जहाजां, मोटरगाड़ियां अर रेलां री आवण-जावण माथे असर पड़्यो। जयपुर हवाई अड्डा माथे दूर तांई निजर नी आवण रे कारण 8 उड़ानां मोड़ी व्ही, जदके केई रेलगाड़ियां ई मोड़ी चाल रही है। आज संवारे अजमेर, कोटा, भरतपुर अर दौसा समेत राज्य रा घणखर ज़िलां मांय दोपहरां तांई धुंअर रही। राजधानी जयपुर मांय संवारे री पोर दूर तांई कांई निजर नी आ रह्यो हो। धुंअर रे कारण दिन मांय ई गाड़ियां री लाइटां जळा र वां ने कम रफ्तार ऊं चलानी पड़ी। ईं बीचे ज़ोरदार ठारी ने ध्यान राखता थकां 25 ज़िलां मांय 8वीं कक्षा तांई रा विद्यार्थियां सारू 10 जनवरी तांई छुट्टी रो ऐलाण कर दियो ज्यो है। मौसम विभाग रे मुजब आवता दो-तीन दिन राज्य रा कुछ हलकां मांय संवारे री पोर घणी धुंअर रेहवण अर एकदम ठण्डा दिन व्हेवण रा आसार हैं। मौसम केन्द्र जयपुर रा निदेशक राधेश्याम शर्मा बतायो के राज्य रा उतराद हलकां मांय आवता 48 घंटां मांय शीतलहर री षंका है।