प्रदेश री सात विधानसभा सीटां माथे उपचुनाव सारू हाल तांई 37 उम्मीदवार पर्चा दाखिल कीना है। निर्वाचन विभाग ऊं मिली जाणकारी रे मुजब गुरूवार ने 26 उम्मीदवार नामपाना दाखिल कीना। गुरूवार ने झुंझुनूं मांय छह, दौसा मांय आठ, खींवसर अर सलूम्बर मांय चार-चार, रामगढ़ मांय दो अर देवली-उनियारा अर चौरासी सीट माथे एक-एक उम्मीदवार पर्चा दाखिल कीना। उपचुनाव सारू पर्चा दाखिल करण रो शुक्रवार ने आखिरी दिन है। पर्चां री जांच 28 अक्टूबर ने करी जावेला अर नाम 30 अक्टूबर तांई पाछा लिया जा सकेला। 13 नवम्बर ने वोट पडेला अर 23 नवम्बर ने वोटां री गिणती करी जावेला। ईं बीचे उपचुनाव सारू प्रचार रो काम जोर पकड़बा लाग्यो है। मुख्यमंत्री भजनलाल शर्मा गुरूवार ने झुंझुनूं अर दौसा मांय भारतीय जनता पार्टी रा उम्मीदवारां री हिमायत मांय जनसभा कीनी। सलूम्बर, झुंझुनूं अर रामगढ मांय उम्मीदवार पर्चा दाखिल करण ऊं पैली वाहन रैली निकाळी।