प्रदेश री पुलिस ने और बेहतर बणावण अर इण ऊं जुड़्या बुनियादी ढांचा सारू 200 करोड़ रुप्या रो पुलिस मॉडर्नाइजेशन एंड इंफ्रास्ट्रक्चर फंड बणायो जावेला। बुधवार ने राजस्थान पुलिस रा 76वां स्थापना दिवस रे मौके राख्यी ज्या जळसा मांय मुख्यमंत्री भजनलाल शर्मा ओ ऐलाण कीनो। वे कह्यो के पुलिस रा जवानां ने रोड़वेज़ री सेमी डीलक्स बसां मांय ई मुफ़्त सफ़र रो सुबीतो दियो जावेला। कार्यक्रम मांय मुख्यमंत्री पुलिस वाळां सारू न्यारा-न्यारा भत्तां मांय बधोतरी रो ऐलाण करता थकां पुलिस रा बेहतरीन सेवा देवण वाळा अहलकारा अर कर्मचारियां ने मुख्यमंत्री सराहनीय सेवा पदक अर पुलिस पदक दे र नवाज़ा। ईं मौके श्री शर्मा कह्यो के पुलिस रा जवानां री हिम्मत, सेवा भावना अर बलिदान री तुलना नी करी जा सके है। वे कह्यो के पुलिस री वर्दी महज़ कपड़ो नी है बल्कि जिम्मेदारी, वचन अर ज़िन्दगी रो मतलब है। मुख्यमंत्री कह्यो के पुलिस वाळा समाज रा असली नायक है। पूरा प्रदेश मांय राजस्थान पुलिस स्थापना दिवस समारोह रा दूजा दिन बुधवार ने ई केई कार्यक्रम राख्यी ज्या। पुलिस लाइनां मांय संवारे री पोर परेड निकाळी ज्यी अर खून दान करण अर पौधा रोपण रा कार्यक्रम राख्यी ज्या। केई ठौड़ां पुलिस बैंड देशभक्ति रा गीतां रा कार्यक्रम पेश कीना। अपराधियां मांय डर अर आमजन मांय विश्वास रा लक्ष्य सागे राजस्थान पुलिस लारला 75 साल ऊं पूरी सावचेती सागे काम कर रही है। लारला साढे सात दशकां मांय केई चुनौतियां रो सामो करता थकां प्रदेश री पुलिस देश रा बेहतरीन पुलिस बल रा तौर ऊं पहचान बणा चुकी है।