प्रदेश मांय व्हे रही चौमासा री बिरखा बीचे मौसम विभाग मंगलवार ने 5 ज़िलां मांय भारी अर 23 ज़िलां मांय मझला दर्जा री बिरखा व्हेवण रा आसार जताया है। ईं बीचे बारां ज़िला रा मांगरोल मांय सब ऊं बत्तो 18 सेंटीमीटर पाणी बरस्यो। लगातार व्हे रही बिरखा रे कारण शाहबाद अर किशनगंज समेत केई ठोडां खास गेलां ऊं कट ग्यी है, जद के केई ठोड़ां पाणी भर्योड़ो है। अलवर, करौली, दौसा, कोटा, टोंक, चूरू, बीकानेर अर हनुमानगढ मांय ई चोखा मेह रा समाचार है। राजधानी जयपुर मांय ई तेज़ बिरखा पाछे जाम अर पाणी भरण रा हालात बण ग्या। भीलवाड़ा, कोटा अर भरतपुर मांय बिरखा रा समाचार है। सवाईमाधोपुर ज़िला मांय ई चोखो मेह बरस रह्यो है। म्हाणा खबरनवीस बतायो के इण ऊं तळावां अर बंधां मांय पाणी आवण लाग्यो है।